Ұстаз бейнесі – шәкірт үшін адамгершіліктің ең жоғары үлгісі. Ұстаздың лаулаған жалыны әр жүрекке жылу сеуіп, нұр құятын қуаттың, өмірдің қайнар көзі. Тіршіліктегі шырақтың сөнбес ошағы. Ұстаз – өзінің бар күшін, бүкіл өмірін бала тәрбиесіне арнаған асыл жан. Талай шәкірттің қанатын қатайтып, үлкен өмірге аяқ басуына себепкер болған ұлағатты ұстаздың бірі – Назигүл Болатқызы.
Талдықорған қаласының облыстық №2 мектеп-интернатында 2006 жылдан бері қызмет етіп келе жатқан Назигүл Каримовадан білім алған шәкірттері бақытты. Аталған мектеп-интернатта тәрбиеші лауазымынан қызметін бастап, өзінің кәсіби біліктілігімен, ұшқыр ойымен, саралы сөзімен көзге түскен, зияты зақымдалған балалардың мүмкіндіктерін, ерекшеліктерін, психологиясын терең түсініп, оқушылармен тығыз қарым-қатынаста жұмыс істейтін ұлағатты ұстазға айналды.
Қасиетті де қастерлі «Ұстаз» сөзінің астарында терең білім мен ғылым, махаббат пен сүйіспеншілік жатқанын байқай бермейміз. Ұстаз болу кез келген адамның қолынан келе бермейтін іс. Шәкірт тәрбиелеу, оны биікке жетелеу, қанаттандыру, жаны мен тәнін, болмысы мен барын беру тек ұлағатты ұстаздың қолынан келеді. Назигүл Болатқызы жақсы қасиеттерді бір бойына жия білген, абыройлы, сыйлы ұстаздың бірі десем артық айтқандық болмас.
Назигүл Болатқызы тек оқушыларға ғана емес, осы интернаттың жас мамандарына да бағыт-бағдар беріп, жол көрсеткен білікті тәлімгер. Жоғары оқу орнын бітіріп келген жас маманға қашанда қол ұшын беріп, көмек көрсетуге дайын тұратын, балалармен жұмыс жасаудың қыр-сырын үйретуден жалықпайтын аяулы жан. Өзінің білім мен біліктілігін арттырып, тәжірибесімен бөлісіп, әдістеме жағынан талай маманға көмектесіп жүретін жақсы қасиеті тағы бар.
Соңына өшпес із қалдырған аяулы жанның жақсылығын бір кісідей көргеніме шексіз қуанамын. Қасиетті білім шаңырағында алғаш кездескен сәттен бастап жақсы маман болып қалыптасуыма бар күш-жігерін арнады. Ұстаз ретінде ұстаз болудың сара жолын көрсеткен жанға алғысым шексіз. Бойымдағы қорқынышты жеңуіме, жас буынымды қатайтуыма, мамандығыма деген махаббатымды еселеген аяулы да ардақты жанға мәңгі қарыздармын. Жақсы адамнан, жақсы маманнан білімді болуды, табандылықты, тәуекелге бел бууды үйрендім.
Ұстаздық пен тәлімгерлікті қатар алып келе жатқан білікті маман Назигүл Болатқызы нағыз жанашыр жан, ұлағатты ұстаз. Жақсылыққа жаны құмар жанның жаны жамандық көрмесін деп тілеймін. Шәкірттерін білім нәрімен сусындатып, тәлім-тәрбие беріп, жақсы қасиеттерді бойына дарытып, адамгершілік нұрын төгіп жүре беруіңізге шын жүректен тілектеспін.
Бұлбұл МУХАМЕТСАРИЕВА,
Талдықорған қаласының облыстық №1 балабақша-мектеп-интернатының директоры, педагог-дефектологы
