Форумның ашылуында Президент Тоқаев қатысушыларды қарсы алып, форумға шетел үкімет басшылары мен халықаралық қауымдастықтың беделді өкілдері қатысып отырғанын атап өтті.
– Мәртебелі меймандарымызға, атап айтқанда, Руанда Президенті Поль Кагамеге, Солтүстік Македония Президенті Гордана Силяновска-Давковаға, Еуропа Кеңесінің Бас хатшысы Ален Берсеге, БҰҰ-ның бұрынғы Бас хатшысы Пан Ги Мунға және Біріккен Ұлттар Ұйымы жүйесінің жетекшілеріне шынайы ризашылығымды білдіремін, – деді Мемлекет басшысы.
Президент форум аясында жаһандық экономика, өңірлік ынтымақтастық және халықаралық күн тәртібіндегі өзекті мәселелер бойынша маңызды әрі нәтижелі пікір алмасу болатынына сенім білдірді.
– Бүгінгі жиын әлемде белгісіздік күшейген кезеңде өтіп отыр. Мұны халықаралық қатынастардағы сын сағаты, тарихи жолайрық деп сипаттауға болады. Алайда бұл бағалауды тарихшылардың еншісіне қалдырған жөн. Қазір ең маңыздысы – осы жағдайға қалай жауап беретіміз. Алдымызда нақты таңдау тұр: қандай шешім қабылдаймыз, қандай құндылықтарды қорғаймыз? – деді Қасым-Жомарт Тоқаев.
AIF-2025 форумы – жаһандық сын-қатерлерге жауап іздеуге арналған ашық және бейтарап халықаралық платформа. Форум барысында түрлі бағыттар бойынша сессиялар, пікірталастар мен кездесулер өтеді деп күтілуде.
