Жаңа жылдың қарсаңында «Ауыл – ел бесігі» мемлекеттік бағдарламасы аясында шалғайда жатқан Көктерек ауылында мәдениет ошағы ашылды.
600-дей тұрғыны бар аядай ауылда Мәдениет үйі әбден тозған еді. Осыны ескерген аудан атқамінерлері бюджет қоржынынан 321 млн. теңге қарастырып, 2 қабатты 200 орынды Мәдениет үйін салуға мұрындық болды. Жаңа нысанда домбыра, вокал, әжелер ансамблі, қолөнер, би үйірмелері жұмыс істейді. 9549 кітаптық қоры бар кітапхана да су жаңа Мәдениет үйінде орналаспақ. Нысанның ашылуына қатысқан аудан әкімі Ғалымжан Маманбаев ауыл жастарын рухани кемелденуге бастайтын орталыққа айналсын деген тілегін де жеткізді.
– Ауданымызда мәдениет саласын дамыту бойынша жан-жақты жұмыстар атқарылуда. Көктеректегі Мәдениет үйінің қайта жаңғыруы ауыл тұрғындары көптен күткен қуаныш еді. Бұл нысан ауыл жастарының өнер әлеміндегі қанатын қатайтып, биіктерге бастайтын қара шаңыраққа айналсын! – деді аудан әкімі Ғалымжан Маманбаев.
Жалпы, Көктерек ауылы – талай тума талантты түлеткен қасиетті мекен. Қазақстан Республикасының еңбек сіңірген қайраткері Жамағат Темірғалиев бастаған талантты буын ауылдың атын талай асқақтатқаны көне- көздерге белгілі. Сонымен қатар, өнертану ғылымдарының магистрі Гүлфайруз Далбағай, Сүйінбай атындағы Алматы облыстық филармониясының «Сазген» ансамблінде ұзақ жылдар жемісті еңбек еткен Ғалиябану Ерболғанова, Алматы және Жетісу облыстарының мәдениет, архивтер және құжаттама басқармасында лауазымды қызмет атқарған Айгүл Сабитова және басқалар көкейінде оты бар жас таланттарға үлгі-өнеге болып келеді.
Мәдениет үйінің ашылуы шынында ауыл жастарын қанаттандырғандай. Ауылда жастайынан өнерімен танылған Айзере Башай Көктеректің атын алыстан шығаратынын, туған жерін көркем әнмен көмкеретінін сөз етті.
– Ауылымыз үшін ерекше сәт. Өнерсүйер жастарға үлкен мүмкіндік ашылып, қолайлы жағдай жасалып отыр. Сол үшін ел ағаларына алғаусыз алғыс, – дейді жас өнерпаз Айзере Башай.
Жақсылық ИГІМАН
