Қазіргі уақытта жасөспірімдер арасында ерте жүктілік көбеюі қоғамды алаңдататын мәселелердің бірі болып тұр. Осы тұрғыда облыстық әкімдікте әйелдер кеңесінің жиыны өтті. Басқосуға Президент жанындағы әйелдер істері және отбасылық-демографиялық ұлттық комиссия мүшесі Зульфия Байсақова қатысты.
Жалпы бүгінгі таңда медициналық көрсеткіштер бойынша 19 жасқа дейінгі жүктілік ерте деп саналады.
Ерте жүктіліктің салдарынан жасөспірімдердің 70%-ы жасанды түсік жасап, 15% — ы түсік тастайды. Қыздардың тек 15%- ы ғана сәбилерін аман-есен жеткізіп, босана алады.
«Ауруын жасырған өледі» демекші, осындай жағдайға душар болғандардың күніне 7-8-і акушер-гинекологтарға барады екен. Бәрі де 15 пен 18 жас арасындағы кәмелетке жасы толмаған қыздар. Тіпті 14-тегілері де бар. Қыздар көбіне құрбыларымен келеді, аналары «елден ұят» деп қыздарының бойын тазалатқанды жөн көреді, ал оның одан арғы өмірі не болады, оған бас қатырып жатпайды. Ұятты ойлаған әке-шеше қызымен 13 жасынан бастап сөйлесіп, қателіктерден бойын алшақ ұстауды үйретер еді.
Ерте жүктіліктің ертеңі бұлыңғыр. Сондықтан бұл мәселеге көз жұма қарауға болмайды. Мұның алдын алу үшін мемлекет тарапынан да көңіл бөлінуде.
Аталмыш жиында ерте жүктіліктің алдын алу шаралары талқыланды. Тақырып аясында жастарға арналған медициналық орталықтарды көбейтуді ұсынды. Бірақ мұндай орталықтарды ашуға тек 40 мың тұрғыны бар елді мекендерде ғана рұқсат етілген. Мұндай мекеме облыста Талдықорғанда ғана бар. Жауаптылардың айтуынша, осындай мекемелер барлық ауданда болса дейді. Сонда жоғарыда аталған мәселені ауыздықтауға негіз болар еді.
– Ерте жүктілік осы күннің трагедиялық ахуалдарының бірі. Бұған отбасындағы тәрбиенің дұрыс болмауы да әсер етеді. Сондықтан ата-аналарда бұған бейжай қарамау керек. 16-17 жас аралығындағы жасөспірімдермен білікті мамандар жыныстық қатынас пен ерте жүктіліктің салдары қандай болатыны жайында дәрістер жүргізсе тиімді болмақ, – дейді Зульфия Байсақова.
Айғаным АЙТМҰХАН
