Айтжан Түркебаев атындағы мектеп-лицейінде оқушы қыздар арасында «Ал, қане, қыздар!» деген атпен байқау өтті. Бұл шара «Берекені көктен тілеме, еткен еңбектен тіле» тақырыбы аясында ұйымдастырылды.
Байқауда жоғары сынып оқушылары жас ерекшеліктеріне қарай екі топқа бөлініп, өзара бақ сынасты. Сайыстың бірінші кезеңінде қос тарап өрелі өлең жолдарымен өздерін таныстырып өтсе, екінші сатысында жылдамдықпен жіпке бисерлерді тізу, түрлі түсті қағаздан ою-өрнек қию, гүл жасау сынды ойын шарттарын орындады. «Тіл өнері» жағынан пән бойынша жұмбақ шешуде екі жақтың қыздары үш тілде мүдірмей жауап берді. «Жауқазын» тобы ұлттық қолөнеріміз тоқыма тоқудан, жіптен шашақ жасаудан, жүн түту сияқты құндылықтарымызды дәріптеуден құралақан емес екенін көрсетті. Тоқыма тоқуда қыздарымыз Әлия Бұғыбай мен Гүлшат Тоқай өзара сынға түсіп, әділқазы алқаларының жақсы деген бағасына ие болды. Қыздар қамыр илеу мен оны жаюдан аналарынан көрген үлгісін таныта білді. Бұл кезеңде Жұлдыз Саматқызы ептілігін көрсетті.
«Білімділер» кезеңінде әр пәннен қойылған сегіз сұраққа Аяжан Әлғожа ұтымды жауап беріп, «Қарапайым қыздар» тобын алға шығарды. Жарыстың жетінші кезеңінде мақал-мәтелдердің мағынасын ашу мақсатында постер құрау арқылы сөздік қорларын танытты.
Бұл шараны ұйымдастырудағы мақсат – қыздардың бойындағы шығармашылық қабілеттің артуына ықпал етіп, әдептілік, парасаттылық, еңбексүйгіштік, патриотизм сынды асыл қасиеттерді паш ету. Яғни, болашақтың іргесін бүгіннен қалай отырып, ертеңгі күннің иелерін тәрбиелеу.
Тартысты өткен байқау барысында екі жақ та бір-біріне дес бермеді. Алайда ұпай санымен «Қарапайым қыздар» тобы жеңіске жетті. Мектепте өткен бұл шара соңы ақын Бөлтірік Атыханұлының сөзімен аяқталды.
Дәулетің, қызым, өнерің,
Өнермен артар беделің.
Өнерің болса бойыңда
Халыққа тиер көмегің.
Білім ордасындағы тәрбиелік мәні зор мұндай іс-шаралар алдағы уақытта да жалғасын табары сөзсіз.
Гүлзия СӘРСЕНБАЕВА,
Айтжан Түркебаев атындағы мектеп-лицейінің педагог-ұйымдастырушысы
Саты ауылы,
Кеген ауданы
