Анафилактикалық шок – бұл ағзадағы өте ауыр аллергиялық реакция. Дер кезінде көмек көрсетілмесе, адам өміріне қауіп төнуі мүмкін.
Анафилактикалық шокты әртүрлі нәрселер тудырады. Атап айтсақ, тағамдар, дәрілер, жәндіктердің шағуы, химиялық заттарды пайдалану.
Анафилактикалық шоктың белгілері аллергенмен жанасқаннан кейін тез пайда болады. Ең көп кездесетін белгілері: дем алудың қиындауы; теріде қышу, қызару; әлсіздік, бас айналу, қан қысымының төмендеуі; есінен танып қалу.
Егер біреу анафилактикалық шокқа ұшыраған жағдайда тез арада «Жедел жәрдем» шақырту керек. Егер науқаста арнайы инекция (эпинефрин) бар болса, оны дереу пайдалану қажет. Сондай-ақ, науқасты арқасымен жатқызып, аяқтарын көтерсе, қан айналымын жақсартады. Ал егер құсса оны бір қырына жатқызған жөн. Адам тыныс алмай жатқан жағдайда жасанды тыныс беріп, жүрекке массаж жасауды ұмытпаңыз. Аурудың алдын алу үшін дер кезінде аллергияңызды анықтап, соған сәйкес заттарды тұтынудан аулақ болған дұрыс. Анафилактикалық шок өте қауіпті, оны ерте байқап, дұрыс көмек көрсетілсе, адамның өмірін сақтап қалуға болады.
Денсаулық – ең басты байлық. Анафилактикалық шок туралы біліп жүру және қажет болса көмек көрсету айналаңыздағы адамдар үшін өте маңызды. Уақытында жасалған көмек өзгенің өмірін сақтап қалатынын естен шығармайық.
Құралай ҚАДЫР,
ШЖҚ «Талдықорған жоғары
медициналық колледжі»
МКК СД 512-тобының студенті
Әділ ШАБДЕН, жетекшісі
