Қаржы саласының сарапшысы Гүлнұр Нұрланқызы аналардың декреттік төлемдеріне қатысты қоғамда қызу талқыланып жатқан мәселеге өз пікірін білдірді. Оның айтуынша, “декретке миллионмен шығатын” аналар туралы айтылған сындар мен қылмыстық істер ашу әрекеттері негізсіз, деп хабарлайды 7-su.kz желілік басылымы.
Сарапшы ең алдымен декреттік төлемдердің қайдан төленетінін нақтылап өтті:
– Декреттік төлемдер мемлекет бюджетінен емес, Мемлекеттік әлеуметтік сақтандыру қорынан (МӘСҚ) төленеді. Бұл қорға кәсіпкерлер мен жұмыс істейтін азаматтар тұрақты түрде әлеуметтік аударым жасап отырады. Бұрын бұл 3,5% болса, 2025 жылдан бастап 5%-ға өседі. Осы қаражаттың ішінде тек әйелдердің емес, ер азаматтардың да үлесі бар. Сондықтан бұл – ортақ жинақ, – деді ол.
Гүлнұр Нұрланқызы декреттік төлемдердің тағайындалу тәртібін де түсіндіріп берді:
– Жетінші айда дәрігер болашақ анаға еңбекке жарамсыздық парағын береді. Ол құжат Халыққа қызмет көрсету орталығына (ХҚКО) өткізіледі. Артынша бірнеше мемлекеттік орган оны тексеріп, 30 жұмыс күні ішінде шешім қабылдайды. Егер сол уақытта заң бұзушылық анықталмаса, төлем беріледі. Енді сол тексерістерден өтіп, заңды түрде ақша алған аналарды қайта қудалау – орынсыз, – деп есептейді сарапшы.
Оның пікірінше, заңсыз әрекетке барған жеке жағдайлар үшін бүкіл аналарға күйе жағуға болмайды. Бұл мәселені шешудің жолы – заңды қайта қарау және оны нақтылау.
Сарапшы аналар мен балаларға мемлекет тарапынан қолдау қажет екенін де айтты:
– Бала туу көрсеткіші елімізде аса жоғары емес. Сондықтан аналарға нақты қолдау керек. Мысалы, босанған аналарға қосымша 1 миллион теңге берілсе де артық етпейді. Қазір тіпті бала 1,5 жасқа толғанға дейінгі жәрдемақы көлемі – небәрі 22 мың теңге. Бұл қаражат қазіргі нарықта жеткіліксіз. Сол себепті аналар табысын арттыру үшін түрлі жол іздеуге мәжбүр, – деді Гүлнұр Нұрланқызы.
Ол сөз соңында болашақ ұрпақтың амандығы мен аналардың әлеуметтік жағдайын жақсарту – мемлекет пен қоғамның ортақ міндеті екенін баса айтты.
Фото: stan.kz
