ҚР «Тұтынушылардың құқықтарын қорғау туралы» Заңының 30-бабына сәйкес абоненттік байланыс құрылғылары айырбастауға немесе қайтаруға жататын тауарлар тізіміне кірмейді.
Осыған қарамастан, ҚР Сауда және интеграция министрлігінің Жетісу облысы бойынша сауда және тұтынушылардың құқықтарын қорғау департаментіне телефондарды қайтару мәселелері бойынша тұтынушылар өтініш білдіруді жалғастыруда және осы мәселе бойынша қандай жағдайларда тауарды қайтаруға болатынын, қайсысында жоқ екенін түсіндіреміз.
Мысалы, 2024 жылдың қыркүйегінде тұтынушы телефонды қайтару мәселесі бойынша департаментке жүгінді. Тұтынушы телефонды сатып алғаннан кейін ол өзінің жеке деректері мен есептік жазбаларын I-CLOUD-қа тіркеп, басқа мәліметтерді де енгізгенін жеткізді. Алайда келесі күні тұтынушы шешімін өзгертіп, тауарды қайтарғысы келді.
ҚР «Тұтынушылардың құқықтарын қорғау туралы» Заңының жоғарыда аталған 30-бабына сәйкес абоненттік байланыс құрылғылары, яғни телефондар, сондай-ақ дәрілік заттар мен медициналық бұйымдар, іш киімдер, шұлық бұйымдары, жануарлар мен өсімдіктер, метражды тауарлар айырбастауға немесе қайтаруға жататын тауарлар тізіміне кірмейтінін хабарлаймыз. Тұтынушыларды осы тауарларды сатып алу кезінде заңнаманы мұқият зерделеуге және сатып алу қажеттілігі туралы жақсы ойлануға шақырамыз.
Сондай-ақ, 2024 жылы Жетісу облысы бойынша сауда және тұтынушылардың құқықтарын қорғау департаментіне телефон сатып алу мәселелері бойынша 17-ге жуық тұтынушы жүгінгенін хабарлаймыз.
Екі тұтынушы телефонның ақауы мен батареяның дұрыс жұмыс істемеуі туралы шағымданды. Департамент тарапынан құқықтық көмек көрсету кезінде аталған тұтынушылар 1 265 000 теңге сомасына айырбастауды жүзеге асыра алды.
Қалған 15 тұтынушы 2024 жылдың екінші жартысынан бері телефондарын «алдын ала тапсырыс» арқылы ала алмай, ақшаларын қайтара алмайтындығына шағымданды.
Тұтынушыларды көздің жауын алатын жарнамалар, «қосымша сыйлықтар мен жақсы жеңілдіктер» қызықтырған. Алайда тұтынушылар телефондарды да, сыйлықтарын да қолдарына алмаған. Залал сомасы қазірдің өзінде 7 миллион теңгеден асты,алайда бұл сома да, зардап шеккендердің саны да әлдеқайда көп болуы мүмкін.
Қазіргі уақытта департаменттен облыс тұтынушыларының пайдасына осы кәсіпкерден ұсынылмаған Тауарлар үшін өндіріп алу туралы сотқа талап арыз берілді.
ҚР СИМ Жетісу облысы бойынша
СТТҚД басшысы А. Дауешев
Фото: androidinsider.ru
