Қазақтың мәдениет пен әдебиет құндылығы өз биігінен ешқашан төмендеген емес. Ел руханиятымен жаңғыра жасасып келеді. Бүгінгі жастар жаңаша серпін алып, қазақ қаламгерлерімен қатар еліне еңбегі сіңген тұлғаларды да тереңінен танып, шығармаларын зерделеуде. Бұл, әрине, олардың білім көкжиегін кеңейтетіні сөзсіз. Ең бастысы, олар танимын деген жанның тұтамдай тіршілікте қылған қам-қарекеті даналыққа негізделген болса, кейінгіге үлгі.
Осындай тебіренісімізге түрткі болған – тарихшы, айтыскер және жазба ақын Андас Омарақын. Қытай қазақтарының айтыс өнерінің дамуына зор үлес сіңірген тұлғаның «Тарих талғарында», «Дода», «Жылдар ізі» атты үш томдық еңбегі кітап болып қатталған. Қазақстан мен Қытайдағы түрлі басылымда 400-ден астам өлеңі, 20-дан астам поэма-дастаны жарық көрген.Еңбектері ағылшын, қытай, түркі халықтарының тіліне аударылған. Аталған еңбектері үшін 2010 жылы ҚХР мемлекет дәрежелі сыйлығы берілсе, кейіпкеріміз 2015 жылы өмірден озып, денесі Талдықорған топырағына қойылды.
Тұлға атын өшірмей кейінгіге дәріптеп жүрген әріптесіміз Қажет Андастың ұйымдастыруымен әкесі Андас Омарақынның оқулары өз деңгейінде өрнек тапты. Аталмыш байқауға қатысқан аймақ оқушылары кіл жүйріктен кім жүйрік екенін өзара анықтасты.
Мектеп жеткіншектері арасындағы дода В. Маяковский атындағы Талдықорған қалалық кітапханасында шымылдық түрді. Игі істің өтуіне облыстық білім басқармасы мен «Jetіsý» газеті, «Қазпошта» АҚ Алматы облыстық филиалы және Андас отбасы мұрындық болды.
Байқау барысында алғашқы болып «Jetіsý» газеті бас редакторының орынбасары Мәди Алжанбай сөз алып, сайысқа қатысушыларға сәттілік тіледі. Өз кезегінде «Қазпошта» АҚ Алматы облыстық фили-алы директорының орынбасары Болатхан Ержігітов лебізін білдірді. Сонымен қатар, «Парасат» орденінің иегері Әуесхан Мажайқызы құрастырған «Андас Омарақын оқулары» атты жинақтың тұсаукесер рәсімі өтті. Аталмыш кітапқа сайысқа қатысушы жас өрендердің ғылыми еңбектері енгенін айта кеткен жөн. Бұл орайда кітап авторы жинақ шығарудағы басты мақсаты – жолдасының шығармашылығын кейінгі жас буынға дәріптеу, талантты балаларға риясыз қолдау таныту екенін атап өтті.
«Андас Омарақын оқулары» байқауы жарты жыл бойы онлайн жүргізіліп келген болатын. Облыс көлемінде білім сайысына 30 -дан астам оқушы қатысты. Барлық тапсырмаларды толық әрі сапалы орындаған 18 оқушы ақтық сынға жолдама алып, әділқазылар алдында білім-білігін көрсетті.
Оқушылар тест сұрақтары, жазба ақындар, өлкетанушылар, айтыс ақындары сынды 4 бағыт бойынша берілген тапсырмаға сай бағаланды. Білімгерлердің қарым-қабілетін, сайысқа дайындығын география ғылымдарының кандидаты Еркін Тоқпанов, «Парасат» орденінің иегері, «Алтын алқалы» ана Әуесхан Мажайқызы, ғылым магистрі, Алматы облыстық кітапхананың қызметкері Мақпал Андас, В. Маяковский атындағы Талдықорған қалалық кітапхананың директоры Күлпан Қалкенова бағалап, қазылық етті.
Алғырлығымен танылған қатысушылар кітап, Алғыс хат, қомақты қаржымен марапатталды.
Қорытынды байқауда жазба ақындар Андас Омарақынның өлеңін оқыса, өлкетанушылар ғылыми жұмысын қорғады, айтыскерлер сөз сайысына түсті. Нәтижесінде жазба ақындар арасында Арайлым Жанахмет, өлкетанушылар бағыты бойынша Жанел Жұмағали, айтыскерлер арасында Ұлан Нұрбол І орын иегері деп танылды.
Жалпы, аталмыш байқаудың өтуіне демеушілік көрсетіп отырған әріптесіміз Қажет Андастың отбасы жарты жыл көлемінде өткен шараға 6 жарым миллион теңгеден астам қаражат бөлген екен. Байқауды дәстүрлі әрі республикалық деңгейде өткізу жоспарлануда.
Медет ЖҰМАБАЙ
