Инсульт – бүкіл әлем бойынша өлім-жітім мен мүгедектікке себеп болатын негізгі дерттердің бірі. Мұндай науқас адамдардың қалыпқа келуіне емдік гимнастика жәрдемдеседі.
Егер науқас өзін жақсы сезінсе, аурудың алғаш күндерінен-ақ оның сал болған аяқ-қолдарын қимылдауға көмектесу керек. Науқасты күтетін адам оның қол-аяғын 10-20 минуттан күніне кем дегенде үш рет қимылдату қажет. Егер қарсы көрсетілімдер болмаса, ишемиялық инсульт бар сырқаттар 2-3 күннен соң, ал миға қан құйылған жағдайда екі аптадан соң төсегінде отыруы тиіс. Науқас сенімді отыра бастағанда оған тұруды, арбаны пайданалануды, сосын жүруді үйретеді. Жүруді үйренуге арнайы жабдықтар, таяқтар қажет. Соның көмегімен бөлмеде жүру, сатымен жоғары көтерілу, төмен түсу, үйден тыс серуендеу. Инсульт алған адамға өз бетінше киінуді, тамақтануды, әжетханаға баруды, жуынуды үйрету өте маңызды.
Әдетте неврологтар инсульттен кейін қимыл-қозғалысты қалыпқа келтіретін дәрілер тағайындайды. Қозғалысқа кедергі болып тұрған бұлшықеттердің бір тобын ғана босаңсыту қажет. Бүгінде бұл үшін ботулиндік токсин қолданылып жүр. Препарат тек арнайы жаттығулармен үйлестірген жағдайда ғана тиімді. Егер темекі тартатын әдетіңіз болса тастаңыз. Науқастың қан қысымы жоғары болса, артық салмақ тастау, алкоголь тұтынбау, дене қимылын көбейту, қан қысымын жиі тексеріп отыру, дәрілерді дәрігердің бақылауымен ішу қажет. Инсультан кейін науқастың сөйлеуі, ден қоюы, жады нашарласа көптеген дәрі-дәрмектің көмегімен дәрігердің нұсқауымен уақытылы дәрілерін ішу қажет. Науқастың белсенді өмір сүргені, мүмкін болса жұмыс істегені дұрыс әрі өте маңызды. Сондай-ақ, кітап оқып, сөзжұмбақтар шешіп, миын жаттықтырғаны абзал.
Жұлдыз РАХЫМЖАНОВА,
Кардиология орталығының
кардиореанимация бөлімінің медбикесі
