«Аманат» партиясының мұрындық болуымен «Қарызсыз қоғам» деген арнайы жоба ашылып, қаржыгер, психолог мамандар жағдайды зерттеп, көпшілікке түсіндіру шараларын жасауда. Сонымен қатар, қаржыны тиімді жұмсауды үйрететін арнайы оқулар ұйымдастырды.
Басты назар халық арасында қаржылық сауаттылықты арттыруға аударылады. Бұл қарапайым адамдарға қолында бар ақшалары мен банктен алған несиелерін жауапкершілікпен басқаруға көмектеседі. Жобаның мақсаты – қаржыға қатыс- ты қауіп-қатерлерді азайтып, дағдарыстардың алдын алуға көмектесетін білім мен біліктілік ұсыну арқылы әр тұрғынның экономикалық әл-ауқатын арттыру. «Қарызсыз қоғам» жобасы жеке және қоғамдық деңгейде шамадан тыс қарыздану мәселесінің алдын алуға аса мән бере отырып, ел ішіндегі экономикалық тұрақтылықты нығайтуға бағытталған.
Жаркент өңіріндегі қаржы сарапшысы Айгүл Бералиеваның айтуынша, Панфилов ауданында жоба басталғаннан бері 2000-ға жуық тұрғын арнайы білім беру курсынан өтіпті. 300 адам мамандардан кеңес алды. Оның ішінде 122 адамға кәсіптік жоспар жасауға көмек берілді, 4 адам тұрақты жұмыспен қамтылды, 400 АЕК қайтарымсыз гранты бойынша 1 адам жартылай фабрикат 1 адам клинингтік компания ашып, қазіргі таңда өз жұмыстарын жалғастыруда. «Ауыл аманаты» бағдарламасы бойынша 6 адам мақұлдау алды, 150 адам банктерден депозит ашты, 27 адам өз қаржысын үнемдеуге ықтияттау кестесін жасап, несиелері бойынша заңгерлік кеңес алып, 35 адам қарыздарын қайта құрылымдап, 45 адамның бұғатталған есепшоттары қайта ашылды.
– Тұрғындарға ақшаны басқаруды, үнемдеуді және қаржыны тиімді жұмсауды, қарыздану мен алаяқтардан аулақ болуды үйреттік. Бұл тұрғындарға пайдалы және қаржылық тұрғыда тұрақты қоғам құруға көмектеседі, – дейді сарапшы Айгүл Бералиева.
Жаркент өңірінде «Қарызсыз қоғам» жобасына жауапты маман апта сайын өңірдегі елді мекендерде түсіндіру шарасын, сабақ өткізіп, ынталыларды отбасына тиімді кәсіп түрлеріне тартып отыр. Бұл іс нәтиже береріне сеніміміз мол.
Мырзағали Нұрсейіт
Панфилов ауданы
