Биыл 15 сәуірде Мемлекет басшысы әкімшілік құқық бұзушылық туралы кодекске енгізілген түзетулермен қоса әйелдер құқықтары мен балалардың қауіпсіздігін қамтамасыз ету мәселелері жөніндегі заңға қол қойған еді. Сол Заң 16 маусымнан бастап күшіне енді. Ендігі ретте кәмелетке толмағандарға қатысты зорлық-зомбылыққа байланысты қылмыстар үшін қылмыстық жауапкершілік күшейтілді. Қасақана ауыр, орташа ауырлықтағы денсаулыққа зиян келтіргені үшін жазалау тәртібі түбегейлі өзгертілді. Жетілген заңға сай енді кәмелетке толмаған баланы зорлағандар өмір бойына бас бостандығынан айырылады.
Заңдағы тың өзгерістер туралы облыстық полиция департаменті бастығының бірінші орынбасары Жасұлан Байкенов жан-жақты түсіндірді. Айтуынша, Заң талаптарының жүзеге асуы отбасылық-тұрмыстық зорлық-зомбылықтың төмендеуіне ықпал етеді.
– Әйелдердің құқықтары мен балалардың қауіпсіздігін қамтамасыз ету – мемлекеттің басым саясаты. Жаңа өзгерістер негізінде әйелдер мен балалардың заңды мүдделерін қамтамасыз ету және елімізде отбасы институтын нығайту үшін қосымша құқықтық тетіктер енгізілді. Ана мен балаға қатысты жасалатын зорлық-зомбылықтың алдын алу мақсатында полиция департаменті жергілікті атқару органымен, қоғамдық ұйымдармен бірлескен жұмыстарды жүзеге асырады, арнайы рейд пен жедел алдын алу іс-шаралары ұдайы негізде өткізіледі, – деді Жасұлан Байкенов.
Айтпақшы, 20 маусымнан бастам вейпингке тыйым салатын заң да өз күшіне енді. Облыстық полиция департаменті бастығының бірінші орынбасары жасөспірімдердің электронды темекіге аса құштар болып алғанын жасырмады. Статистика жасөспірімдердің дені атаулы бұйымға әбден құмартқанын айшықтайды. Ж. Байкенов мұның себебін жарқын қаптамамен және әртүрлі дәммен жастарды тартатын өндірушілердің белсенді маркетингтік стратегиясымен байланыстырады. Енді оларға шектеу заңмен қойылады. Аталмыш құжатқа сай шекпейтін темекі өнімдерін әкелу және өндіру 2 000 АЕК (7 384 000 теңге) дейінгі айыппұлдарды, түзеу жұмыстарын, бас бостандығын шектеуді немесе мүлкі тәркіленіп, одан айыруды қоса алғанда, қатаң жазалауға жатады.
– Елімізде «Вейп» электронды құрылғының айналымына бақылаудың күшеюі оның денсаулыққа қаншалықты зияндылығының дәлелі екенін атап өткен жөн. Бұл бәлекет мектеп оқушылары арасында да таралып жатқаны жасырын емес. Сондықтан әрбір ата-ананы балаларының қауіпсіздігі үшін бірлесе қарекет етуге шақырамыз, – деді облыстық полиция департаменті бастығының бірінші орынбасары Жасұлан Байкенов.
Дастанбек САДЫҚ
