Көгілдір отын арқылы аймақтардың экономикалық мүмкіндіктерін кеңейтіп, экологияны сақтауға болады. Осы ретте «Жетісу облысының кешенді газдандыру аймақтық бағдарламасы» шеңберінде атқарылып жатқан жұмыс жүйелі түрде жолға қойылған. Көксу ауданына қарасты Қазақстан ауылының тұрғындарының енді газға қосылуға толықтай мүмкіндігі бар.
2030 жылға дейін өңірдегі 358 елді мекеннің 192-ін табиғи газбен қамтамасыз ету жоспарға енгізілген. Белгіленген жоспар шеңберінде биыл жыл соңына дейін Көксу, Қаратал, Ескелді аудандары және Талдықорған қаласын алғанда, тағы 11 елді мекен көгілдір отынмен қамтамыз етілмек. Бұл облыстың газдандыру деңгейін 56,5% — ға дейін арттыруға мүмкіндік береді. Алдағы уақытта тағы 433 шақырымға газ тарату желілері салынады. Бұл өңір тұрғындарының өмір сүру сапасын едәуір жақсартпақ.
Газдандыру жобаларын іске асыру үшін 2024 жылы облыс бюджетінен 12 млрд. теңге, оның ішінде республикалық бюджеттен 6,8 млрд. теңге бөлінген. Көрсетілген қаражаттың осы уақытқа дейін 5,2 млрд. теңгесі игерілді. Жергілікті бюджеттен бөлінген 5,2 млрд. теңгенің 817 млн. теңгесі игерілген екен. Қосымша қаржыландыру 10,4 млрд. теңгені құрайтынын да атап өткен жөн. Ол қаражаттың «Самұрық-Қазына» АҚ дивидендтерінен түсетінін атап өту маңызды.
Биылғы қыркүйек айында 24 елді мекен үшін құрылыс-монтаждау жұмыстарын орындауға шарттар жасалды. Бұл инфрақұрылымды одан әрі жедел дамытуға үміт береді. Ашықтық пен тиімділікті қамтамасыз ету үшін тағы 18 елді мекенге жобалау-сметалық құжаттама әзірленуде, олардың сараптамасын аяқтау мерзімі желтоқсан айының соңына дейін белгіленген.
Көксу ауданына қарасты Қазақстан ауылына газ келіп, тұрғындар көптен күткен көгілдір отынға қол жеткізді. Себебі, осы күнге дейін 100-ге жуық үй, көмір жағып келген еді. Жалпы, Көксу ауданы бойынша 34 елді мекеннің 26-сы газдандырылады. Ал газға қосылған 18 ауылдың 3,5 мың тұрғын үйі көгілдір отын қызығын көруде. Қалған 7 елді мекен бойынша құрылыс жұмыстары жүргізілуде. Газ желілерінің құрылысы 2025 жылы кезең-кезеңмен аяқтау жоспарлануда.
Көксу ауданы әкімінің орынбасары Мәди Карбаев өз сөзінде газды қосу өңірлік инфрақұрылымды дамытуда және ауылдағы өмір сүру жағдайларын жақсартуда шешуші рөл атқаратынын атап өтті.
– Газдандыру жергілікті тұрғындардың тұрмысын жеңілдетіп қана қоймай, ауылдың одан әрі өсуіне қуатты серпін береді. Біз ауданның әрбір тұрғыны үшін қолайлы жағдай жасау бойынша жұмысты жалғастырып жатырмыз, — деді ол.
Ауылға газдың келуі салтанатты түрде аталып өтті. Көпшіліктің қуанышы риясыз байқалды.
– Біз бұл күнді жылдар бойы күттік. Бастысы от жағу машақатынан құтылдық. Бұл жаңалық әсіресе үй шаруасындағы әйелдерді қатты қуантты. Өйткені олар енді отын тасу, күл шығару сынды жұмыстарынан арылады. Бастысы тіршілік жеңілдейді. Біздің қажеттіліктерімізге назар аударған аудан және облыс басшылығына рахмет, – дейді ауыл тұрғыны Сапарғали Смағұлов.
Медет ЖҰМАБАЙ
Көксу адуаны
Суретті түсірген Жеңіс Ысқабай
