С. Сейфуллин атындағы орталық кітапханада ұлт әдебиетінің аса көрнекті өкілі, ақын, қоғам қайраткері Ілияс Жансүгіровтің туғанына 130 жыл толуына орай фестиваль өтті. Шара «Ілияс – қазақ құлагері» атты кітап көрмесі мен ақын атындағы әдеби мұражайдың жылжымалы көрмесінен бастау алды.
Фестивальдің тізгінін алған алаштанушы, Алаш бағытындағы «Qyr balasy» білім, ғылым қоғамдық қорының құрылтайшысы Ертай Біләл ақын шығармашылығы мен өмірін тереңірек танудың маңыздылығына тоқталды.
Шара барысында Е. Тоқтарбайдың құрастыруымен Ілияс Жансүгіровтің бұрын жарияланбаған шығармалары топтастырылған «Бет-ашар» атты кітабының тұсаукесер рәсімі өтті. Ал ғалымдар мен әдебиеттанушылар ақын шығармашылығының философиялық қырларын, оның ұлттық әдебиет пен мәдениеттегі алатын орнын жан-жақты зерттеп, тың ойларымен бөлісіп, баяндама жасады. Филология ғылымдарының докторы, профессор Мұратбек Иманғазинов «Ұлттық құндылықтарының маңыздылығы» атты баяндамасында Ілиястың ұлттық құндылықтар мен мәдени мұраларымызды сақтаудағы рөліне ерекше тоқталды. Оның пікірінше, ақын тек әдебиетімізді байытушы ғана емес, халықтың рухани болмысын, ой-санасын айқындаушы тұлға болды.
Өлкетанушы, ғылым магистрі Қажет Андас «Қазақ әдебиетінің нар тұлғасы» атты баяндамасында Ілиястың әдеби мұрасын зерттеп, оның рухани құндылықтарын түсіндіре отырып, қазақ әдебиетіндегі орнын анықтап, шығармаларының мәнін тереңдете баяндады. Ілияс Жансүгіровтің әдеби мұражайының директоры Нұргүл Жауынбаева «Ақын мұрасының ұрпақ үшін құндылығы» атты баяндамасында ақын мұраларының ұрпаққа жету жолындағы рөлін атап өтті.
Фестивальде ақынның шығармашылығы мен өміріне арналған көптеген естеліктер айтылып, арнаулар оқылды. Жетісу облысының жас ақындары Ілиястың рухына деген құрметін арнауларымен жеткізсе, Бикен Римова атындағы драма теа- трының әртістері әйгілі «Ағынды менің Ақсуым» өлеңін мәнерлеп оқыды. Дәстүрлі әнші Төлеутай Серіков «Шиліөзен қамыс-ай» әнін әуелетті.
Аруна Жәнібекова,
Жетісу облысының Сәкен
Сейфуллин атындағы орталық кітапханасының негізгі қорды сақтау бөлімінің меңгерушісі
