Өнеркәсіп және құрылыс министрлігінің өкілдері маусым айында 50 қазақстандық кен орны жер қойнауын пайдаланудың бірыңғай платформасында электрондық аукционға қойылатынын мәлімдеді.
Бұл туралы 7-su.kz желілік басылымы Stan.kz сайтына сілтеме жасап хабарлайды.
INEX-тің 15-ші тау-кен геологиялық форумында министрлік бұл кен орындарын 25 жылға дейінгі мерзімге лицензиямен өндіруге берілетінін жеткізді.
Ал шарт бойынша, компания тау-кен жұмыстарының жоспарын құрып, кен орнын игеру мерзімін көрсетуі керек. Аукцонға АҚШ, Еуроодақ және Қытайдан компаниялар өтініш білдірген.
«Бұл баланстық қорлары бар кен орындары. Біз оларды олжа ретінде пайдаланамыз. Бұл кен орындарында алтын, көмір, сирек металдар, полиметалдар шығарылады. Жақын арада ақпаратты жер қойнауын пайдаланудың бірыңғай платформасында жариялайтын боламыз. Нысандарды шығарған соң барлық ниет білдірушілер аукционға қатыса алады. Ол үшін құжаттарды онлайн тапсырып, қатыса алады», — деді Өнеркәсіп және құрылыс министрлігінің Жер қойнауын пайдалану департаментінің директоры Алмас Көшімов.
Мамандардың айтуынша, мұндай аукциондар Қазақстанға инвестиция тартуға көмектеседі. Сонымен қатар, кейбір пайдалы қазбалар жиналатын орындар тиісті құжаттаманың болмауына байланысты әлі жарияланбаған.
«2024 жылдың қорытындысы бойынша бізде қатты пайдалы қазбалардың 23 кен орны болды. Олар алғаш рет мемлекеттік есепке алынды. Мәселен алтын туралы айтар болсақ, мемлекетке 20 тонна алтын пайда ретінде қосылды. Сол секілді жыл сайын геологиялық барлау нәтижесі бойынша қорлар бекітіліп, мемлекеттік есепке қойылады және оны өндіруге тартады», — деді ол.
Фото: freepik.com
