Тәуелсіздік – ең басты құндылығымыз. Биыл еркін ел болғанымызға 31 жыл толып отыр. Бұл – қайта жаңғырған қазақ мемлекетінің, ата-бабаларымыз ғасырлар бойы ұмтылған бостандықтың тұғыры нығая түскенін әйгілейтін маңызды белес. Тарихи тұрғыдан бағамдасақ, аса көп уақыт емес. Десе де жұртымыз аз уақыт ішінде әлемдік алпауыттармен терезесін теңестіріп, қарышты қадамдарымен танылып үлгерді.
Өзінің белгіленген шекарасы, діні мен тілі, Мемлекеттік рәміздері мен ұлттық құндылықтары, мәдениеті мен салт-дәстүрі бар тәуелсіз зайырлы елімізде бейбітшілік пен ауызбірлік басты ұран саналады. Біздің тәуелсіздігімізбен бірге Желтоқсан көтерілісі де айрықша маңызға ие. Өйткені,1986 жылдың желтоқсан айында жастарымыз алғаш рет қызыл империяға қарсы тұрып, дербестік туралы үн қатты. Одан бері 36 жыл өтті. 1986 жылы өрімдей ұл-қыздарымыз Кеңес одағының қаһарынан қаймықпай, ұлт намысы үшін алаңға шықты. Көтерілістен соң тура бес жыл өткенде тәуелсіздігімізді жариялауымыздың символдық мәні зор.
Бұл орайда азаттықтың алғашқы қарлығаштары – Желтоқсан қаһармандарының ерлігі лайықты бағасын алып, кең көлемде насихатталуы керек. Бұл жайлы ел Президенті Қасым-Жомарт Тоқаев «Тәуелсіздік – бәрінен қымбат» атты бағдарламалық мақаласында айрықша атап айтты. «Бағдар мен белес», «Таным мен тағылым», «Қоғам мен құндылық», «Ұлағат пен ұстаным» атты төрт бөлімнен тұратын мақалада Мемлекет басшысы азаттық алғалы бері жеткен жетістіктерімізді, бағындырған белестерімізді үш кезеңге бөліп, ашық талқылай отырып, күрмеуі қиын мәселелерді еңсеру жолдары туралы кемел ойларымен бөліседі. Сондай-ақ, осы мақалада экономикалық даму, әлеуметтің әлеуетін көтеру, білім сапасын жақсарту, мемлекеттік тіл, жер, мәдениет, экология салалары, жастардың тәлім-тәрбиесі сияқты еліміз үшін маңызды мәселелер көтерілді.
Мемлекет басшысы тарихымызды танып, қастерлеу, дәріптеу қағидаға айналу керектігін қаперімізге салды. Отанымыздың болашағы біздің қолымызда. Егер әрқайсымыз ел үшін қызмет ете берсек, республикамыз одан әрі дами берері сөзсіз. Елімізде ауызбірлік сақталып, бүкіл ұлттар біріксе, жолымызда кездесетін барлық қиындықтарды жеңіп шығатынымыз анық.
Жанна СЫЗДЫҚБАЕВА,
Сарыөзек орта мектебінің ағылшын тілі пәні мұғалімі
Кербұлақ ауданы
Жетісу облысы
