Облыс әкімдігінің мәжіліс залында Жетісу облыстық мәслихатының кезектен тыс XXII сессиясы өтті. Сессияны облыстық мәслихаттың төрағасы Гүлнар Тойлыбаева жүргізді. Сессияға облыс әкімінің орынбасары Марлен Көлбаев қатысты.
Облыстық депутаттар кеңесінің отырысында облыстық табиғи ресурстар және табиғатты пайдалануды реттеу басқармасының басшысы Елдос Мырзабек жаңа тарифтер және тұрғындардың табиғат сыйларын жинауға қажетті ақпаратпен бөлісті. Оның айтуынша, жеке тұлғалардың мемлекеттік орман қоры аумағында тегін, рұқсаттама құжаттарынсыз жабайы өскен жемістерді, жаңғақтарды, саңырауқұлақтарды, дәрілік шикізатты және де өзге орман ресурстарын өз мұқтажы үшін жинау Қазақстан Республикасының Орман кодексінің 42-бабының 2,3-тармақтарына сәйкес қудаланады. Мәслихаттың тұрақты комиссияларының отырысында осы мәселе жан-жақты зерделеніп, тиісті шешімдер қабылданды.
Жиындағы екінші мәселе бойынша облыстық денсаулық сақтау басқармасының басшысы Арман Жансеңгіров баяндама жасады. 2023 жылы «Жергілікті бюджет қаражаты есебінен азаматтарды тегін немесе жеңілдетілген жол жүрумен қамтамасыз ету» бағдарламасы бойынша тұрақты тұратын елді мекеннен тыс жерде медициналық қызметтерді алуға 18,0 млн. теңге бөлінген. Басқарма басшысының айтуынша, Республикалық электронды денсаулық орталығы берген жолдама саны 560 адамды құраған. Денсаулық сақтау басқармасында 220 өтініш қаралып, 181 азаматқа төлем жасалған. 2024 жылы жоғарыда аталған бағдарлама бойынша 15,3 млн. теңге бөлініп, 234 адам жолдама алған. Тегін медициналық көмектің кепілдік берілген көлемі шеңберінде жоғары технологиялық медициналық көрсетілетін қызметтерді, Міндетті әлеуметтік медициналық сақтандыру жүйесінде медициналық көмекті алуға Жетісу облысында тұратын Қазақстан Республикасының азаматтарына тұрақты тұратын елді мекеннен тысқары жерлерге тегін жол жүруді ұсыну мәселесі қаралды. Бұл мәселе облыстық мәслихаттың бірлескен тұрақты комиссияларының отырысында жан-жақты талқыланып, ұсыныстарды депутаттар бірауыздан қолдап, тиісті шешім қабылдаған.
Күн тәртібіндегі барлық мәселеге дауыс берген депутаттардан кейін облыс әкімінің орынбасары Марлен Көлбаев сөз алды. Ол облыстың депутаттық корпусын келе жатқан Республика күнімен құттықтап, жемісті еңбек тілеп, халықтың игілігі жолындағы белсенді жұмысы үшін алғыс айтты. Облыстың әлеуметтік-экономикалық және қоғамдық дамуы үшін халық қалаулыларының еңбегі зор екенін атап өтті.
Еңлік КЕНЕБАЙ
Фото: https://www.instagram.com/p/DBdNk9wSq6Y/
