«Jetіsý Medıa» ақпарат алаңында өткен кезекті брифингте облыстық білім саласында сапаны қамтамасыз ету департаментінің басшысы Сәуле Қабимолдаева жаңа оқу жылына дайындық барысын саралау мақсатында мектептерге жүргізілген мониторинг қорытындысын жариялады.
ҚР Білім және ғылым министрінің тапсырмасы негізінде облыстың 760 мемлекеттік жалпы білім беретін мектебіне мониторинг жүргізілді. Кешенді тексерісте жекелеген мәселелердің бар екені анықталды. Атап айтар болсақ, әрбір 5-ші мектепте спортзал жоқ, өйткені ол мектептер бейімделген ғимаратта орналасқан. Мектептердің үштен бір бөлігі МЖМБС-на сәйкес оқу кабинеттерімен жабдықталмаған, жартысынан көбінде химия, биология, физика пәндері бойынша оқу бағдарламасының практикалық бөлігін орындауға арналған жабдықтар жетіспейді.
Жергілікті атқарушы органдар тарапынан апатты жағдайдағы және үшауысымды мектептерді жою бойынша ауқымды жұмыстар жүргізіліп жатқанына қарамастан облысымызда әлі де 49 үшауысымды және 3 апатты жағдайдағы мектеп жұмыс істейді.
Балалардың қауіпсіздігін сақтауда медициналық қызмет көрсету мен тамақтануды ұйымдастыру маңызды мәселе болып табылады. Бұл ретте облыс мектептерінің медициналық қызметке лицензиялары бар немесе денсаулық сақтау ұйымдарымен шарттар жасалған. Мектептердің 86 пайызы тамақтану орнымен қамтылған. Қалған 14 пайызында контингенттің аздығына байланысты жалға алушылар болмағандықтан асхана немесе буфет жұмыс істемейді.
Барлық мектеп бейнебақылау қондырғыларымен жабдықталған. Күрделі жөндеуге байланысты 9 мектепте, жаңа ғимарат құрылысының аяқталуына байланысты бір мектепте, ағымдағы жөндеуден кейінгі жұмыстардың себебінен 2 мектепте бейнебақылау уақытша жоқ.
Бейнебақылау жүйелерінің автоматтандырылған режимдегі жұмысына, бейнекамераларды жедел басқару орталығының жүйелеріне немесе аумақтық полиция органдарына қосуға қатысты кемшіліктер бар. Бұл бағытта білім беруді басқару және ішкі істер органдарымен бірлескен жұмыс жүріп жатыр.
Биыл 19 мектеп күрделі жөндеуден өтуде. Ескелді ауданының Рүстембеков атындағы орта мектебінде күрделі жөндеу жұмысы аяқталды. Оқу жылының басталуына дейін 9 мектепте күрделі жөндеу жұмыстарын аяқтау жоспарлануда.
Бүгінгі таңда күрделі жөндеу немесе жаңа ғимараттың құрылысы жүргізіліп жатқан 8 мектеп интернет желісіне қосылмаған, – деді Сәуле Нұраханқызы.
Сондай-ақ, департамент басшысы биыл педагогтарды жұмысқа қабылдау тәртібіне өзгерістер енгізіліп жатқанын да атап өтті. Енді педагогтар жұмысқа конкурстық негізде қабылданады. Жоғары оқу орнын педагогикалық мамандық бойынша бітірген түлектер мектепте кешенді тест тапсырады. Білім сапасын сырттай бағалау ретінде білім беру ұйымдарында мемлекеттік аттестация өтеді және оқушылардың функционалдық сауаттылығын анықтау мақсатында білім алушының оқу жетістігіне мониторинг жүргізіледі.
Жергілікті атқарушы органдар департамент тарапынан мониторинг нәтижелері туралы уақытылы хабардар етіліп тұратынын, осы орайда мектептер бойынша ахуал толық баяндалған 30-ға жуық хат жолданғанын жеткізген баяндамашы баспасөз мәслихаты соңында журналистер сауалдарына жауап берді.
Алма ТОПАНТАЙҚЫЗЫ
