Президент Қасым-Жомарт Тоқаев Денсаулық сақтау министрі Алексей Цойға эпидемиологиялық жағдайды қатаң бақылауда ұстауды, жаппай вакциналау қарқынын жеделдетуді, науқастарға, оның ішінде алғашқы медициналық-санитарлық көмек деңгейінде уақытылы медициналық көмек көрсету жөніндегі жұмысты сапалы ұйымдастыруды тапсырды.
Моноқалада да індетке қарсы қабылданған қаулыға сай халыққа қызмет көрсететін орындарда санитарлық талаптардың сақталуын қадағалау бойынша мониторингтік топ жұмысына басымдық берілуде. Мекеме, кәсіпорын ұжымдары арасында жаңадан пайда болған штамның қауіптілігі және індеттен тиімді қорғанудың бірден-бір жолы вакциналау екені айтылып, түсіндіру жұмыстары жүргізілуде.
Текеліде инфекцияға қарсы вакциналау пункттері қарқынды жұмыс істеп тұр. Олар қалалық ауруханада, «Достық» және «Металлург» шағынауданындағы, Рудничный ауылындағы амбулаторияда орналасқан. Сондай-ақ, орталық базардың кіреберісінде, Арбатта жылжымалы вакциналау пункті жұмыс істейді.
Қалада алғашқылардың бірі болып екпе алып, ұжымдық иммунитет қалыптастырған кәсіпорындардың қатарында «Текелі Гранит» ЖШС мен «Текелі» шипажайы және «Славянский двор» жеке кәсіпкерлігі бар. Аталмыш кәсіпорындар бірыңғай екпе алып, «Ashyq» қосымшасы арқылы жұмыстарын жандандыруда. Пандемия басталғаннан бері бүкіл әлемдегі, оның ішінде, біздің елдегі бизнес айтарлықтай шектеулермен жұмыс жасауға мәжбүр болғаны баршамызға мәлім. Бұл кәсіпкерлік қызметтің кірісіне айтарлықтай зиян келтірді. Осыған байланысты бизнес-қауымдастық «Атамекен» ҰКП-ның қатысуымен Қазақстанда «Ashyq» жобасын іске асыруға бастамашылық етті.
Соңғы мәліметтерге сүйенсек, бүгінде Текеліде 27 нысан «Ashyq» қосымшасы арқылы жұмыс істеуде. Жоба арқылы жұмыстарын жандандырып, көш бастап келе жатқан демалыс орындарының бірі – «Славянский двор» жеке кәсіпкерлігі.
Тұрғындар вакцина алу арқылы ғана індеттің беті қайтатынын түсініп, жаппай екпе алуда. Отбасымен, ұжыммен келіп салдырып жатқандар да жетерлік. Иә, кеселдің таралуын тоқтату үшін бұрынғыдай адам көп шоғырланатын орындарға барудан мүмкіндігінше бас тартып, үйде болып, сыртқа шыққанда бетпердені дұрыстап тағып, әлеуметтік арақашықтықты қатаң сақтағанымыз абзал.
Ұлжан ҰЛДАХАНҚЫЗЫ,
Текелі қаласы әкімінің
баспасөз хатшысы
