Үкімет отырысында 2025 жылдың 11 айындағы Қазақстанның әлеуметтік-экономикалық даму қорытындылары қаралды.
ҚР Ұлттық экономика министрлігінің мәліметінше, негізгі макроэкономикалық көрсеткіш – жалпы ішкі өнімнің (ЖІӨ) өсімі 6,4%-ға жеткен. Бұл ел экономикасының тұрақты даму жолына түскенін көрсетеді.
Президенттің сапалы экономикалық өсімді қамтамасыз ету және халықтың әл-ауқатын арттыру жөніндегі тапсырмаларын орындау аясында экономикада сенімді өсу қарқыны байқалып отыр.
Өсімнің негізгі драйверлері ретінде өнеркәсіп пен ауыл шаруашылығы салалары аталды. Атап айтқанда, өнеркәсіп өндірісінің өсімі 7,3%-дан 7,4%-ға дейін жеделдесе, ауыл шаруашылығы 6,1%-ға артқан.
Сонымен қатар нақты сектордың өзге де салаларында оң динамика сақталуда. Көлік саласы 20,3%-ға, құрылыс 14,7%-ға өсті, ал сауда көлемі 8,8%-ға артты.
Экономика сыртқы факторларға бейімделіп, тұрақты даму траекториясына шықты. Базалық салалардағы жедел өсім әлеуметтік міндеттемелерді орындауға және ауқымды инфрақұрылымдық жобаларды жүзеге асыруға берік негіз қалыптастырады, – деді Премьер-министрдің орынбасары – ұлттық экономика министрі Серік Жұманғарин.
«Жетісу-Ақпарат»
