Ресейлік инсайдер Иван Карпов «Челси» клубы «Қайрат» шабуылшысы Дастан Сәтпаев үшін қомақты қаражат төлеуге дайын екендігін алға тартты.
«Соның ішінде 2,4 миллион еуро – нақты төлем, ал қалғаны «Қайрат» немесе жалға берілген өзге клуб сапында өткізген ойындары үшін бонус ретінде қарастырылады. Бес жылдық келісімшарт 2026 жылы – Дастан 18 жасқа толғанда күшіне енеді.
Сәтпаевқа қызығушылық танытқандар арасында «Зальцбург», «Байер», «Бенфика» мен «Реал Сосьедад» бар. Алайда «Челси» Дастанды өз қатарында көру үшін барын салды», — деді Карп.
«Аристократтар» Сәтпаевтың трансферін 4,3 миллион евроға бағалап, «Қайратпен» келісімге келіп отыр. Бұл туралы белгілі инсайдер Фабрицо Романо өз әлеуметтік парақшасында жариялап, трансферді растады. Бірақ, 16 жасар сұрмерген кәмелет жасына толғанша «Қайрат» сапында ойнауы мүмкін. Яғни, Челсимен 5 жылдық келісім-шарт 2026 жылы күшіне енеді. Оған дейін «көктер» Дастанды алматылықтарға жалға береді деген ақпарат айтылуда.
Жалпы футболдан Қазақстан чемпионатының тарихында ең үлкен трансфер бұған дейін «Астана» ФК шабуылшысы Патрик Твумасиде болған. Елордалықтар Патрикті 3 миллион еуроға Ла Лиганың «Алавес» клубына сатқан. Ал қазақстандық аяқдопшылардың ішінде Нұралы Әліп үшін «Зенит» 2 миллион еуро берген.
