Ауданның орталығы Кеген ауылындағы отын базасында көмір бағасы қолжетімді. Ойқарағай көмір кенішінде көмірдің әр тоннасы 7.5 мың теңге болса, Кеген ауылындағы отын базасы тасымалдауға кететін шығындарын есептегенде көмірдің әр тоннасын 14 мың теңгеден сатады.
Отын базасынан көмір алғандар ұтылмайды. Қанша сұраса, сонша тонна көмірді арнайы таразымен өлшеп береді. Оның үстіне, қазіргі таңда көпшілік отын базасы арқылы көмір алуды құп көруде.
– Ауданымыздың орталығынан отын базасының ашылғаны жақсы болды. Өздерінің жекеменшік жүк көліктерімен Ойқарағайдан көмір тасымалдайтындардың шамадан тыс баға қойып, көмір саудалайтынына жұртшылық орнымен ренішті болатын. Ал, мынау отын базасы ел мен жұртқа ең тиімді болды. Таразымен өлшеп береді. Сатушы да, алушы да дән риза. Осы отын базасы арқылы көмірдің әр тоннасының бағасы да жыл сайын шарықтап өсіп кетпей, бірқалыпты жағдайға түсті. Жалпы, отын базасына деген тұ рғындардың ризашылығы шексіз, – дейді Кеген ауылының тұрғыны, аудандық ардагерлер мен ақсақалдар кеңесінің төрағасы Сабыр Досымбеков.
Мұнда Ойқарағайдың көмірі, Алматы қаласы жақтан әкелінетін «Шұбаркөл», «Қаражыра» кеніштерінің көмірлері тау-тау болып үйіліп жатыр. Кегенбек Мұқанов басшылық жасайтын отын базасы келушілерін жылы қарсы алып, қызметтерін көрсетіп шығарып салып жатады.
Қанат БІРЖАНСАЛ
