Еліне адал еңбек еткен азаматын халқы ешқашанда ұмытпайды. Ағайынның алғысына бөленген абзал жанның ел көңіліндегі еңсесі қашанда биік, есімі ардақты. Өмірден озса да ондай тұлғаларын ауылдастары ардақтап , еске алып отырады. Өткен ғасырдың отызыншы жылы жазиралы Жаркент өңірінің Әулиеағаш ауылында дүниеге келіп, Талдықорған, Алматы облыстарында, республика деңгейінде медицина саласында мақтаулы істер атқарып кеткен хирург-дәрігер, медицина ғылымдарының кандидаты, профессор, Ғылым академиясының құрметті мүшесі Әлімбатыр Исабеков жайлы айтқанда толғанысты талғаусыз сөз бастау мүмкін емес.
Ауылдағы қарапайым малшының баласы бүлдіршін кезінен білімге құштар болып өсіпті. Ол 1947 жылы сол кездегі Октябрь ауданының орталығы болған Көктал кентіндегі, қазіргі Абай атындағы орта мектепті үздік оқушылар қатарында тамамдаған. Әлімбатыр Исабекұлы 1948-1954 жылдар аралығында Алматыдағы медицина институтында білім алып, оны үздік студенттер қатарында тамамдағаннан кейін сол кездегі Алматы облысының Қапал ауданына жолдамамен жұмысқа жіберіледі. Бір жылдан кейін өңірдің бас дәрігері болып тағайындалды. Қапалда бес жыл абыройлы еңбек еткен бас дәрігер-хирург өңірдегі денсаулық сақтау қызметін аймақтағы алдыңғы қатарлы мекеме дәрежесіне жеткізді. Білікті дәрігерге Талдықорған облысы құрылған сәттен жаңадан ұйымдастырылған облыстық онкология диспансерін басқару жүктелді.
Қолға алған ісін тиянақты атқарып, ізденімпаздықпен қарекет жасайтын Әлімбатыр Исабекұлы аймақтық онкология диспансерінің ауқымын жылма-жыл кеңітіп, бір мезетте 200 сырқаттың стационарлық ем қабылдауына мүмкіндік туғызды. Емдеу орнына білікті мамандарды тартып, хирургия, гинекология, терапия, урология, радиохирургия бөлімдерін ұйымдастырды. Өзі де қызметін тәжірибемен ұштастырып, 2500-ге жуық сырқатқа ота жасап, нәтижелі ісімен ауру адамдардың алғысын арқалады.
Талдықорғанда еңбек ете жүріп 1959 жылы Мәскеудегі КСРО Денсаулық сақтау министрлігі жанындағы медицина қызметін ұйымдастырушылар курсында оқып, медицина ғылымдарының кандидаты ғылыми атағын қорғайды. 1963 жылы Денсаулық сақтау министрлігінде емдеу басқармасын басқарып, алқа мүшесі болды. Одан кейін он жылға жуық уақыт Алматы облыстық денсаулық сақтау бөлімін басқарды. Ол қандай қызметке барса да өзінің шебер ұйымдастырушы, білікті маман екенін танытты.
Бойындағы еңбекқорлық, қарауындағы мамандарға, дос-жаран мен ауылдас ағайынға деген қамқорлығы оның жеке тұлғасын биіктетті. Жарты ғасырға жуық халықтың денсаулығын сақтау саласындағы еселі еңбегі, ізденімпаздығы абыройға бөледі. Медицина ғылымдарының кандидаты, профессор Әлімбатыр Исабеков Алматы облысының Құрметті азаматы, 1994 жылдан Қазақстанның Құрметті азаматы атақтарына ие болды. Ғылым академиясының құрметті мүшесі еді. КСРО Қорғаныс министрлігі мен Денсаулық сақтау министрлігінің «Еңбек үздігі» төсбелгісімен екі мәрте марапатталды. Басқа да көптеген медальдарын санамағанда, заманының аса жоғары наградалары саналған мерейтойлық медальдарды, екі мәрте Еңбек Қызыл Ту және Октябрь революциясы ордендерін кеудесіне тақты.
Ол берекесі мен бірлігі ұйыған бақытты отбасының отағасы еді. Өмірлік жары Сағадат Қожағұлқызы Алматыдағы малдәрігерлік институтында физика-математика пәндерінен ұзақ жылдар студенттерге сабақ берген ғалым-ұстаз болды. Олар отбасында үш қыз, бір ұл өсіріп, бәрін де жоғары білімді, адамгершілік қасиеттері үстем азаматтар етіп тәрбиелеп, қатарға қосты. Әлімбатыр Исабекұлы 2017 жылы 87 жасқа қараған шағында өмірден озды. Ауылдастары ардақты азаматты жиі еске алып, оның есімін туған жерінде көше атымен мәңгілеуді көптен бері құзырлы орындарға айтып, жазып келеді. Жақында Көктал, Үшарал ауылдық округтерінен бір топ еңбек ардагері бізге жолығып, білікті дәрігер болған білімді ғалым, аймақтың медицина саласының ардагері Әлімбатыр Исабекұлының есімін Жаркент өңіріндегі Әулиеағаш ауылындағы бір көшеге беру жөніндегі бастамаларын қалың қауым, аймақ жұртына жеткізуімізді өтінді. Орынды тілекті ел-жұртқа жария ету парыз. Ауылдастар тілегін ел басқарған азаматтар ескерер деген үміттеміз.
Мырзағали Нұрсейіт
Панфилов ауданы
