Қазақстанда авторлық құқық туралы заңға түзетулер әзірленіп жатыр. Ол коммерциялық мақсатта пайдаланылған музыка авторларына қаламақы төлеу мәселесін шешуге бағытталады.
Әділет вице-министрі Ботагөз Жақсылекованың айтуынша, түзетулер биыл күзде қаралады.
«Әйгілі авторлардың ізбасарлары келіп, төлемақы дұрыс берілмей жатқанын айтып шағымданады. Бұл қоғамдық бірлестіктерді авторлардың өздері құрған, бірақ тиімсіздері бар. Көптеген авторлар шағымданып, мейрамханалар, ойын-сауық орындарынан, теле-радио бағдарламалардан ақша түскенімен, жиналған қаражат оларға жетпей жатқанын айтты», – деді ОКҚ брифингінде Ботагөз Жақселекова.
Шенеуніктің айтуынша, заң жобасы аясында әділет министрлігі мекемелерге белгілі талаптар мен ережелерді белгілей отырып, бұл процестерді әдістемелік тұрғыдан реттейді.
«Биыл осындай құқықтарды басқару ұйымдарын тексеруге бастамашылық жасадық, бірақ бұл үлкен қарсылық тудырды. Енді қаражатты жинау және бөлу ережелері белгіленеді. Қазір мейрамханалар мен мекемелерден авторлық туындыларды пайдаланғаны үшін жиналған қаражаттың 70%-ы авторлар арасында бөлінуі керек. Қалған 30%-ы – авторлық құқықты басқаратын ұйымдардың әкімшілік шығындары, яғни еңбекақы төлеу және т.б.», – деп түсіндірді вице-министр.
Төленуі тиіс 70% музыкалық шығармалардың авторларына түрлі себептермен жетпей жатады. Көбінесе оларға ақша алуға құқығы бар екені туралы мүлде хабарланбайды. Вице-министр атап өткендей, жаңа түзетулер төлемдердің нақты көлемін де белгілейді.
