Үкімет ең төменгі жалақыны есептеу тәсілін қайта қарауға кірісті. Бұл туралы Премьер-министрдің орынбасары – Ұлттық экономика министрі Серік Жұманғарин Сенаттағы брифингте хабарлады.
Серік Жұманғариннің айтуынша, қазіргі әдістеме еңбек нарығының нақты талаптарына сәйкес келмейді.
Оның сөзінше, орташа және медиандық жалақы арасындағы айырмашылық ескерілуі тиіс:
«Шын мәнінде, ең төменгі жалақыны есептеу әдістемесін қайта қарап алу қажет. Бізде орташа жалақы бар, медиандық жалақы бар. Кейбір сарапшылар ең төменгі жалақы медиандық жалақының шамамен 45–50 пайызы болуы тиіс деп есептейді. Осындай тәсілдердің барлығын реттеп, жүйеге түсіру керек. Бір нәрсені көтеріп, екіншісін өзгертпей қою дұрыс емес. Мұны жоспарлы негізге қойған жөн», – деді ол.
Вице-премьердің айтуынша, жаңа әдістемені енгізу үшін фискалдық консолидация қажет. Бұл бюджет кірістерін ұлғайтып, тиімсіз шығындарды қысқартуды талап етеді.
«Бүгін Премьер-министр бұл жұмыстың қалай жүргізілетінін атап өтті. Сондықтан алдымен 2026 жылдың бірінші жартысында салық және бюджет реформасының іске асуын көреміз. Сол кезеңде 2027–2029 жылдардың бюджетіне кірісеміз, ЕТЖ мәселесі де сол уақытта қаралады», – деп түсіндірді Серік Жұманғарин.
