Талдықорғанда Халықаралық Еріктілер күні аталып өтті. Осы ретте көпке көмек қолын созған игі жандар мерейленді. Ізгі істе үлгі болғандар ҚР Мәдениет және ақпарат министрлігінің «Қайырымдылық үшін» төсбелгілерімен марапатталды.
«Жыл волонтері» облыстық сыйлығының марапаттау рәсімі сән-салтанатпен өтті. Ұйымдастырушылар шараға жиылған жұрттың көңілін әнмен серпілтті. Әрмен қарай кезек марапатқа берілді.
Салтанатты жиында ауылдық жерлерде тілдік сауаттылық деңгейін арттыруға қосқан үлесі үшін «Біргеміз: Білім» номинациясын Дана Жакуляқызы жеңіп алса, денсаулық сақтау саласына қосқан үлесі үшін «Біргеміз: Саулық» номинациясын Лариса Пятова иемденді. Балалар үйіндегі жасөспірімдерге, өмірлік қиын жағдайға тап болған жастарға тәлімгерлік етуге бағытталған «Біргеміз: Сабақтастық» номинациясымен Әсел Барибаева, мәдени-тарихи мұраны сақтау және дамытуға қосқан үлесі үшін «Біргеміз: Асыл мұра» номинациясымен Динара Бакирова марапатталды. Жануарларға деген жауапкершілік көзқарасты қалыптастыруға бағытталған «Біргеміз: Аяла» номинациясы Вероника Гузенкоға, экологиялық мәдениетті дамытуға қосқан үлесі үшін «Біргеміз: Таза әлем» номинациясы Ғазиз Аманжолұлына бұйырды. Холида Кусанова жоғалған адамдарды іздестіру, төтенше жағдайлардан қорғауға бағытталған «Біргеміз: Үміт» номинациясының иегері атанса, Жанна Жақанқызы әлеуметтік қызмет көрсеткені үшін «Біргеміз: Қамқор» номинациясының жеңімпазы атанды. Ең белсенді және нәтижелі волонтерлік қызмет көрсеткені үшін «Жыл волонтері» номинациясының жеңімпазы ретінде Екатерина Середина танылды.
Жалпы облыс бойынша 800-ге жуық ерікті тіркелген. Олардың қатысуымен жыл көлемінде 2300-ге жуық арнайы акциялар мен қайырымдылық шара ұйымдастырылған.
Шара аясында жеңіске жеткен әр жеңімпазға 300 мың теңге көлемінде сый-ақы берілді.
Медет ЖҰМАБАЙ
