«Қазақстан егіс алқабы және жайылымдық жер көлемі жағынан әлемде алтыншы орын алады. Біз бидай экспорттайтын 10 ірі мемлекеттің қатарына кіреміз. Ұн экспорты бойынша көш басындағы елдің біріміз» деген Президент Қасым-Жомарт ТОҚАЕВТЫҢ сөзі жоспарды еселей түсуімізге әсер етті.
Биыл еліміз үшін оңай жыл болған жоқ. Бірақ соған қарамастан шаруалар бел жазбай еңбек етті. Тынымсыз еңбектің нәтижесінде қамбамыз астыққа толды. Күздік жиын-теріннен 26,7 миллион тонна дақыл жиналған. Мұны Мемлекет басшысы соңғы 10 жылдағы рекордтық көрсеткіш деп ерекше атап өтті. Бұл таза шаруалардың ерен еңбегі деп айтуға болады.
Ауылшаруашылық саласының дамуына мемлекет тарапынан көп қолдау білдірілуде. Біршама техниканы жаңартып, аз шығын, көп өнім алуда заманауи технологияларды пайдаланып келеміз. Енді бізге бір орында тұралап қалуға болмайды. «Еңбек – бәрін жеңбек» деген ұранмен білек сыбана жұмысқа кірісіп, жақсы нәтиже көрсетуіміз қажет.
Форумда Мемлекет басшысы келер жыл «Жұмысшы мамандықтары жылы» болып жарияланғанын, нағыз еңбек адамдары жоғары деңгейде ұлықталуға тиіс екенін айтты. Бізге, яғни шаруаларға осыдан артық құрметтің керегі жоқ.
Ауылшаруашылығы бәсекеге қабілетті озық сала болуы үшін қолдан келгеннің бәрін жасаймыз. Агроөнеркәсіп кешені экономикадағы басты қозғаушы күштің біріне айналуға тиіс. Біз осы жолда тынымсыз еңбек ететін боламыз.
Ескендір ЖАЙЛЫҒҰЛОВ,
«Жалайыр» шаруа қожалығының басшысы
Көксу ауданы
