Бүгінгі күні физика пәнін сапалы оқы- ту – ұстаздарды толғандырып отырған келелі мәселелердің бірі. Ал, сапалы оқуға негіз қалайтын педагогикалық технологиялар екені сөзсіз. Жаңа технологиялар оқушылардың сабақ барысындағы белсенділігін арттыра отырып, нәтижелі білім алуға жол ашады.
Әлемдік деңгейдегі білім берудің қазіргі парадигмасы білім беруді оқушының жеке тұлғасына бағыттау, ал оқыту әдістерін тұлғааралық қарым-қатынастарға бейімдеу болып табылады. Демек, оқушы білімді дайын күйінде мұғалім түсіндірмесінен алмай, өзінің өмірлік тәжірибесіне сүйену арқылы танымдық шығармашылық тапсырмаларды орындау негізінде әртүрлі өнімдер жасау арқылы алуға тиіс. Нәтижесінде оқушының дүниетанымы кеңейіп, өзіндік пікірі мен көзқарасы қалыптасады.
Теория мен практиканың байланыста болуын қамтамасыз ету үшін әрбір пән бойынша берілетін білімнің мазмұны мен көлемін анықтағанда теориялық қағидалар, заңдылықтар мен ережелер, яғни, ұғымдық-ақпараттық материалдар ескерілуі тиіс. Бұл орайда берген білімнің бала өмірінде кездесетін түрлі мәселелерді шешуге көмегі тиетіндей, оны қолдана алатындай практикалық маңызы болуы қажет.
Сыни тұрғыдан ойлау барысында бала өз заманының озық өнегесін санасына сіңіреді, функционалдық сауаттылығы артады, басқаның пікірін тыңдауға дағдыланады және өз ойын айтуға үйренеді. Физика сабағында бағдарлама материалын сапалы меңгерту үшін оқыту мен жазу арқылы сыни тұрғыдан ойлауды дамыту технологиясын және басқа да белсенді педагогикалық технологиялардың әдістерін кірістіре отырып, оқушыларды бір-бірімен пікірлесуге, ойларын нақты, ашық жеткізе білуге, тұжырымдар жасауға үйрету көзделеді.
Қай пәнді оқытуда да заманауи технологиялардың көмегі зор. Ғылыммен тығыз байланысты физика пәнін оқытуда оның тиімділігі жоғары. Тек оқытудың озық технологияларын сабақ барысына қарай ұтымды, тиімді пайдалана білген жөн. Сонда ғана сапалы білім негізін қалаймыз.
Мәруар АХМЕТҚАЛИЕВА,
Талдықорған жоғары
политехникалық колледжінің физика
пәні оқытушысы
