Күні кеше биылғы білім беру гранттарының нәтижесі жарияланды. Ғылым және жоғары білім министрлігінің баспасөз қызметі көрсеткен ақпаратта грант тағайындау конкурсына қатысу үшін 94 мың талапкер құжат тапсырғаны көрсетілген. Бұл көрсеткіш былтырғымен салыстырғанда 14 мыңға артық.
Мемлекеттік гранттар республикалық комиссия отырысының қорытындысы бойынша тағайындалған. Комиссия құрамында ҚР Парламентінің депутаттары, мүдделі мемлекеттік органдардың, бiлiм саласы кәсiподақтарының, ҚР Ұлттық кәсiпкерлер палатасының, ҚР Жоғары оқу орындарының ассоциациясының және қоғамдық ұйымдардың өкілдері болған.
Биыл ел Президенті Қасым-Жомарт Тоқаевтың тапсырмасына сәйкес халық тығыз қоныстанған батыс және жаңадан құрылған облыстардың жастары үшін грант бөлінді. Педагогикалық, инженерлік, IT мамандықтарға және жаратылыстану ғылымдары бойынша Атырау облысына 1500, Маңғыстау облысына 1500, Ұлытау облысына 300, Жетісу облысына 300, Абай облысына 500, Шымкент қаласына 400, Түркістан облысына 500 грант берілді.
Бір гранттық орынға ең үлкен конкурс «Стоматология» БББТ бойынша болған екен. Бұл мамандық бойынша 22 талапкер бір орынға таласса, «Халықаралық қатынастар және дипломатия» мамандығына 14, «Құқық» саласына 11, «Музыка мұғалімдерін даярлау», «Денешынықтыру мұғалімдерін даярлау» және «Психология» мамандықтарына 10 адамнан таласқан. Ал грантқа үміткерлер арасында балдар теңдігі жағдайында басым құқыққа ие болатындардың саны 20 мыңға жуықтағанын да айта кеткен жөн. Олардың ішінде «Алтын белгі» иегерлері, халықаралық және республикалық олимпиадалардың жеңімпаздары, оқу үздіктері бар. Сондай-ақ, гранттарды үйлестіру барысында әлеуметтік осал санаттағы балалардың квоталары ескерілгенін қалыс қалдыруға болмас.
Осы орайда ғылым және жоғары білім вице-министрі Қуаныш Ерғалиевтің ҰБТ қорытындысы туралы айтқанын еске сала кетейік. Оның сөзінше, 18 мамыр мен 5 шілде аралығында барлығы 304 мың түлек тестілеуге өтініш білдірген. Олардың 76 пайызы қазақ тілінде сынақ тапсырса, 79 пайызы шекті балл алған.
Ендігі жердегі ескеретін дүние – жоғары оқу орындарына құжаттарды тапсыру 25 тамызға дейін жүзеге асырылатыны. Сондай-ақ, алдағы уақытта Жетісу облысы әкімінің гранты жайлы да толыққанды ақпарат беретін боламыз.
АРДА БИ
