Имидж – көпқырлы ұғым. Мұны зерттеу ХХ ғасырда бастау алған. Имидждің алғашқы теоретигі ретінде Н. Макиавеллиді айтамыз.
Имидж ұғымы (ағылшын тілінен аударғанда «imagе») «бейне», «кейіп», «образ» деген мағынаны білдіреді. Егер С. Ожеговтың түсіндірмелі сөздігіне назар аударсақ, образ ұғымының өзінде бірнеше түрлі мағынаның жатқанына куә боласың: түр-сипат, кейіп; біреуді не болмаса бір затты елестету; шынайы қалыптасқан көркем бейне; тип, мінез-құлық; тәртіп, әдіс. Сонымен қатар, образ ұғымы – адам ой-санасымен қалыптасқан қандай да бір материалдық зат пен құбылыстың идеалды бейнесі, түрі делінсе, имидж ұғымы – бір адамның ішкі көрінісін, бейнесін басқа адаммен елестете көруі деген де тұжырым бар.
Тарихи деректерге жүгінсек, алғашқы болып имидж ұғымы шетел ғалымдарының зерттеулерінде жарық көрген. Американдық экономист К. Болдинг имиджді – адамның жүріс-тұрысын қалыптастыратын құрылым деп санаған. Ал, В. Шепель «Имидж – өзіне назар аудару мақсатында өзіндік күшімен не болмаса әлеуметтік топпен не бұқаралық ақпарат құралдарымен құрылған жеке дара бейне» деген пікір жазған. Бұл орайда, И. Нефедов және Е. Власов «Жаманды жасырып, жақсы қасиетті асыра көрсету» деп тұжырымдаған.
Қалай десек те, имидж қалыптастыру заманның талабы, адамдарға керекті дүние екені даусыз. Имидж – бір орында тұратын құбылыс емес, оны бір рет қалыптастырып алған соң барлық кезеңде ұстап тұру қиын. Сондықтан ол қалыптасумен қатар, үнемі жетілуді қажет етеді.
Қаржан НҰРХАН,
Талдықорған қаласындағы физика-математика
бағытындағы Назарбаев
зияткерлік
мектебінің
11-сынып
оқушысы
