Үкімет отырысында Премьер-министр Олжас Бектенов интернет-алаяқтық пен киберқауіпсіздік мәселесін көтеріп, тиісті министрліктерге нақты тапсырмалар берді, – деп хабарлайды 7-su.kz ақпараттық порталы.
– Бүгінде телефон және интернет-алаяқтық жағдайларының көбейіп жатқанын көріп отырмыз. Олардың дені шетелдік нөмірлердің және ұлттық жүйемізде тіркелмеген құрылғылардың көмегімен жасалады. Сондықтан Жасанды интеллект және Ішкі істер министрліктері осындай заңсыз әрекеттерге тосқауыл қою жұмыстарын күшейтуі қажет. Деректер базасынан азаматтардың дербес мәліметтерінің таралып кеткені үшін жазаны қатаңдату керек. Мұндай талап мемлекеттік органдармен қатар, қаржы ұйымдарына, мобильді операторлар мен жеке бизнеске де қатысты болуға тиіс, – деді Үкімет басшысы.
Сонымен қатар Олжас Бектенов балаларды цифрлық кеңістікте қорғаудың маңыздылығына тоқталды.
– Балалардың цифрлық кеңістікте қорғалуын қамтамасыз ету үшін Sim Kids жобасының тәжірибесін кеңінен тарату керек. Байланыс нысандарын салу кезінде басы артық бюрократиядан арыла алмай келеміз. Кейде антенна бағанын орнату жұмыстарының өзі бір жылға дейін созылып кетуі мүмкін. Жаппай цифрландыру жағдайында мұндай үдерістерді оңтайландырып, барынша жеделдету керек, – деді ол.
Премьер-министр Жасанды интеллект министрлігіне Өнеркәсіп және құрылыс министрлігімен және байланыс операторларымен бірге бір ай ішінде осы мәселеге қатысты нақты ұсыныстар әзірлеуді тапсырды. Сондай-ақ өңір әкімдіктеріне байланыс операторларына базалық станциялар орнату үшін орын бөлуге жәрдемдесу қажеттігін атап өтті.
