Бұқаралық ақпарат құралдары қызметкерлерінің күні қарсаңында журналистика саласында ұзақ жылдар еңбек еткен әріптестеріміз марапатқа ие болды.
Солардың бірі – ардагер журналист Болат Абаған. Алматы облысының әкімі Марат Сұлтанғазиевтің қолынан ол «Құрмет» орденін салтанатты түрде алды. Болат Абаған 1994 жылдан бастап «Jetisý» газетінде еңбек етіп, зейнеткерлікке дейін Жетісу өңірінің тыныс-тіршілігін насихаттауға үлес қосты. Газетте тілші, бөлім меңгерушісі, бас редактор, сондай-ақ «Өлке тынысы» ЖШС директорының орынбасары қызметтерін атқарды. Республикалық «Айқын» газетінің меншікті тілшісі де болды. Ол – «Қазақстанның Құрметті журналисі», «Ақпарат саласының үздігі», «Қазақ журналистикасының қайраткері» атақтарының иегері.
Сондай-ақ, «Jetisý» газетінде меншікті тілші, редакция меңгерушісі, сайттың веб-редакторы қызметін атқарған, қазіргі уақытта Алматы облыстық «Алатау арайы» газетінің бас редакторы Қуаныш Тұңғатар да «Ақпарат саласының үздігі» атағына ие болды.
Ал ұзақ жылдар бойы өңірдің бас басылымында табанды еңбек етіп келе жатқан тәжірибелі журналист Гүлжан Тұрсынның да еңбегі еленді. Ол Қазақстан Республикасы Парламенті Сенатының төрағасы Мәулен Әшімбаевтың қолынан марапат алып, кәсіби мерекеде Астана төрінен құрметке бөленді. Гүлжан Тұрсын – 30 жылдан астам уақытын 100 жылдан астам тарихы бар басылымға арнаған қаламы қарымды журналист.
Редакция ұжымы атынан марапат иелерін шын жүректен құттықтай отырып, шығармашылық табыс, қажымас қайрат тілейміз. Қаламдарыңыз мұқалмасын, шығар биіктеріңіз асқақтай берсін!
Құрметпен, «Jetisý» газетінің ұжымы
