Уақыт желдей ескен, көзді ашып-жұмғанша жыл айналып кетер бүгінгі таңда жақсыға алғыс айтып үлгермей жатырмыз. Шығармашылық иелерінің ел үшін тудырған туындыларын көріп, оқып жүрсек те, тебіреніске, терең ойға түссек те, оны өзгелерге үлгі ету үшін жарты ауыз сөз арнауды да ұмыт қалдырамыз. Бұл орайда мен «Ұстаз» фильмі туралы толғануды жөн санадым.
Бүгінгі таңда сан алуан кинотуынды көрерменге жол тартты. Көргеннің көбін ұмытып қаласың. Өйткені негізгі айтар ойы шамалы, өмірден алған мысалы шындықтан алшақ жатқан фильмдер жарнамалық дүниелермен жарыса экранға шығып жатыр. Қателесіп не ағат айтып тұрмыз ба? Даусыз келісеріңіз ақиқат.
Екіншіден, уақыт сұранысына сай туындылар таспаланып жатқаны шамалы. Кино-индустрияның негізгі тегершігіне айналған «Қазақфильм» секілді үлкен ұжым болмаса, дәл қазіргі уақытта әрбір адам өзі қалаған сценарийді икемдеп алып таспалап жатқаны анық. Оның ішінде салмақтысы, ой салар мазмұндысы жоқ емес. Дегенмен, бүгінде кинотеатрларда беріліп жатқан фильмнің басым көпшілігі комедия жанрында екенін ескерсек, жеңіл әзіл, арзан күлкі сыйлайтын қазақ кинотуындыларының көбі жыл айналғанда қайталап көруге тартпайды. Әйгілі «Қыз Жібек» секілді туындыларды жыл айналған сайын қайталап көре бергің келеді.
Неге? Өйткені онда тарихтың шымыр шындығы, бабалардың ізгілік пен іңкәрлігі, ұлттың рухани коды таспаланған, айшықталған. Ал бұл орайда бүгінгі фильмдердің ішінде оқ бойы озық тұрған Бейсен Құранбектің сценарийі арқылы таспаланған режиссер Ерлан Ұшақбаевтің «Ұстаз» фильмін үлкен мақтанышпен айта аламыз. Мұнда өмір шындығы, бүгінгі қоғамдағы ұлағат иесінің бет-бейнесі, тартысы, тұлғалық көзқарасы, ұлт пен ұрпақ үшін атқарар өмірлік ісі айқын көрініс тапқан. Сондықтан да шағын толғамымда осындай «Ұстаз» фильмі көңіл тебіренткенін айтып, Жетісу жерінің төл туындысындай бұл киноны түсірген әрбір жанға, актерлерге алғысымды жеткізгім келеді.
Нұрсерік МҮЛКІБАЕВ,
М. Тынышбаев атындағы
мектепке дейінгі шағын орталығы бар орта мектеп» КММ-нің математика мәнінің мұғалімі
Сарқан ауданы
