Көксу ауданында қоршаған ортаны қорғау және экологиялық мәдениетті арттыру мақсатында «Таза бейсенбі» экоакция ұйымдастырылды, – деп хабарлайды 7-su.kz ақпараттық порталы.
Игі шараға аудандық мәслихат депутаттары, жастар орталығының өкілдері, аудандық партия филиалының мүшелері мен ауыл тұрғындары, еріктілер, белсенді азаматтар қатысты.
Балпық би ауылындағы М. Сеңгірбаев атындағы саябақта өткен сенбілікке 30-ға жуық адам жұмылдырылып, 3 тоннадан астам қоқыс жиналды. Қатысушылар қоғамдық орындардың тазалығына ерекше мән беріп, аумақты қоқыстан тазартты. Акция барысында көгалдандыру жұмыстарын да атқарды.
– «Біздің мақсат – тек қоқыс жинау емес, тұрғындарға табиғатты аялаудың маңызын көрсету. Әрбір азамат өз ауласынан бастаса, бүкіл ауданымыз таза болады», – деді «AMANAT» партиясы Көксу аудандық филиалының төрағасы Мәлік Бейсенов
«Таза бейсенбі» акциясы алдағы уақытта ауданның басқа да елді мекендерінде жалғасын таппақ.
