Сарыөзек ауылындағы Күреңбел қазақ орта мектебі оқушылардың тұлғалық дамуына ерекше көңіл бөліп отыр. Осы ретте білім ошағында өзін-өзі басқару кабинеті ашылып, «Мектеп парламенті» ұйымы құрылды. Ұйымға 15-ке жуық оқушы мүше болып тіркелді.
Жаңадан ашылған сынып кішкентай болғанымен іші жанға жайлы. Мұнда ең әуелі жылылық бар. Бұл өзін-өзі басқару кабинетін мектеп педагогтары мен оқушылары түрлі көрнекілік, естелік сурет, ұлы ойшылдардың ұлағатты сөзі, портреттерімен безендірген.
– Сыныпты шәкірттердің игілігіне бөлгені үшін аудандық білім бөлімінің басшылығына алғыс айтамыз. Мұнда әуелі балалар өз идеяларын дамытып, жаңа мүмкіндіктерге, армандарына қол жеткізе алады деп ойлаймын. Бұл жерде енді «Құқық парламенті» мен «Жас журналист» клубы, «Жас эколог» клубының оқушылары жұмыс істейтін болады. Қандай да бір іс-шара өткізетін болса осы кабинетте ақылдасады, – дейді өзін-өзі басқару ұйымының жетекшісі Әйгерім Әлмұханбет.
Мектеп парламентінің басты міндеті — білім алушылардың мүддесін дамытып, оларды қоғамдық өмірге белсене қатыстыру. Сондай-ақ, әрбір оқушының шығармашылық қабілетін шыңдау. Парламент жұмысы 8 фракцияның негізінде жүргізіледі. Әрбір фракция оқушылардың қызығушылықтарын, бағытталған түрлі іс-шараларды жүзеге асырады.
– Білім бөлімінен және мектеп басшылық тарапынан қолдау көрсетіп, өзін-өзі басқару ұйымына арнайы кабинет ашып жатырмыз. Жастарды үнемі жігерлеyдіріп отырған да ғана олар жақсы нәтиже көрсете бермек. Жалпы Күрбелең мектебінің оқушылары республикалық, облыстық деңгейде керемет жетістіктерге жетіп жатыр. Ауданның білім алып жатқан оқу ошағының атын шығарып жатқандары бізді қуантады, – дейді аудандық білім бөлімінің баспасөз хатшысы Алмас Үмбетұлы.
Ақнұр Сәрсен мектеп парламентінің белсенді мүшесі. Облыстық «Бейсен Құранбек» байқауының жеңімпазы. Өз фракциясының жұмысын жауапкершілікпен атқарып жүргендердің бірі. Ол алдағы уақытта шығармашылық пен білім саласында сан белесті бағындыратынына кәміл сенімді.
– Осы «Жас журналистер» клубының жетекшісі болғандықтан оны дамыту менің жауапкершілігімде. Кабинет ашылғаннан кейін клуб мүшелерімен ақылдасу, бізге репортаждар түсіру, әлеуметтік желіге видеолар салу оңайырақ болады. Бұрын жеке сынып болмағандықтан оқушылармен бірлесіп жұмыс істеу қиындық туғызатын. Енді алаңсыз ойға алған ісімізді жүзеге асырмақпыз, – дейді ол.
Күреңбел мектеп парламенті – аудандағы ең үздік ұйымдардың бірі ретінде танылып отыр. Жуырда ұйым құрамындағы оқушылар облыстық балалар құрылтайына қатысып, ерекше белсенділігі мен ұйымдастырушылық қабілеттері үшін «Әрекет уақыты» алғыс хатымен марапатталды. Жалпы бұл білім мекемесінде 112 мұғалім қызмет атқарады. 1000-ға жуық бала білім алуда.
Медет ЖҰМАБАЙ
Кербұлақ ауданы
Фото: Дмитрий Ерофеев
