Қазақ халқы әу бастан мал баққан, сол арқылы жан баққан халық. Төскейін төрт түлікке толтырып, ел ырызығын еселейтін ауыл жұртының берік тағаны – мал шаруашылығы.
Сарқан аудандық ауыл шаруашылығы және жер қатынастары бөлімінің мәліметінше, өңірдегі 164 шаруа қожалығында 17 610 бас ірі қара, 41 900 бас қой мен ешкі, 8800 бас жылқы, 410 бас түйе өсірілуде. Мал азығын қамтамасыз етуге 12027 тонна жем, 68 957 тонна шөп дайындалған. Мал басын асылдандыруда жүйелі жұмыс жүргізілуде.
Нәтижесінде ауданда мал шаруашылығы қарқынды дамуда. Ата дәстүрді жалғастырып, оны отбасылық кәсіпке айналдырып, табысын еселеп отырған жерлестеріміз көп. Солардың бірі шалғайдағы Бөрлітөбе өңірінде орын тепкен Қарашыған ауылдық округіндегі Мұқашев шаруа қожалығы.
Ауыл тұрғындары үшін негізінен мал шаруашылығын ұйымдастыру тиімді. Жергілікті тұрғындар тұрақты жұмыспен қамтылып, ай сайын еңбегіне сай еңбекақы алады. Мал өнімі еселенсе кіріс те молаяды. Әлеуметтік-тұрмыстық жағдайы жақсарып, еңбек еткеннің еңсесі биіктейді. Шаруа қожалығында еңбек етіп жүргендердің тұрмысын қамдап алғанын көріп, осындай ойға келдік.
– «Мал баққанға бітеді» деп тегін айтылмаса керек. Төрт түлікті бағу оңай шаруа емес. Әр істің өзіне тән қиындығы болады. Мал бабын тауып, шын ниетіңмен қарасаң ғана берекесін береді. Олай болмаса, ісің кері кетеді, – дейді шаруашылық жетекшісі Қанат Мұқашев.
2013 жылы құрылған шаруашылық қыстан қысылмай шығуы үшін бағымындағы 230 ірі қара, 150 жылқы мен 100 қойға 10 тонна жем, 200 тонна шөп дайындапты. Күнделікті 5 жұмысшы уақытылы жем-шөбін, суын беріп қадағалап отыр. Шаруа қожалығы техникалардан да құр алақан емес. Оның бәрі шаруашылықтың күнделікті қажеттілігіне жарап тұр.
Жақсылық ЖОМАРТҰЛЫ,
Сарқан ауданы
Фото: nationalgeographic.kz
