IT технологияларының дамуы – ерекше назар аударылатын басым бағыттардың бірі.
2025 жылғы 28 қаңтарда өткен Үкіметтің кеңейтілген отырысында Президент Қасым-Жомарт Тоқаев: «Қазақстан цифрландыру ісінде, әсіресе, мемлекеттік қызмет көрсету саласын цифрландыру жолында едәуір жетістікке жетті. Жаппай цифрландыру мемлекеттің азаматтармен және бизнес өкілдерімен қарым-қатынасын айтарлықтай жеңілдетеді», – деп атап өтті. Осы тұрғыда өңірлік деңгейде IT саласының дамуы ерекше маңызға ие.
Жетісу облысында IT саласын дамыту аясында «Jetisu Digital» IT-хабы ашылып, сәтті жұмыс істеуде. Жобаның негізгі мақсаты – Жетісу өңірінде IT саласын дамыту, білім беру, стартаптарды қолдау және кәсіби IT қауымдастығын қалыптастыруға ықпал ететін іс-шараларды ұйымдастыру.
IT-хаб базасында 2 000-нан астам адам ақпараттық технологиялар саласындағы түрлі бағыттар бойынша білім алды. 2024 жылы 74 іс-шара өткізіліп, олардың барлығы кәсіби дағдыларды дамыту мен инновациялық шешімдерді қолдауға бағытталды.
Сондай-ақ хабта стартап-жобаларды қолдау бағдарламасы жұмыс істейді. Инкубациялық бағдарламаға қатысқан 40-тан астам жоба менторлық қолдауға, тренингтерге және заманауи техникалық ресурстарға қол жеткізіп, өз жобаларын дамытуға мүмкіндік алды.
Маңызды қадамдардың бірі – Samsung және ҚР Цифрлық даму, инновациялар және аэроғарыш өнеркәсібі министрлігінің қолдауымен Samsung Innovation Campus бағдарламалау мектебінің ашылуы. Компания компьютерлік сынып құруға және 13-25 жас аралығындағы жастар үшін Python бағдарламалау курстарын тегін ұйымдастыруға инвестиция салды. 2023-2024 жылдар аралығында 280 адам оқуды аяқтап, Samsung сертификаттарын алды.
Ұлттық статистика бюросының соңғы мәліметтері бойынша, Жетісу облысында IT-қызметтердің көлемі 2,5 есеге жуық артқан. Бұл саланың қарқынды дамуын көрсетіп, IT инфрақұрылымы мен білім беру бағдарламаларын одан әрі кеңейтудің маңыздылығын дәлелдейді.
2025 жылы IT-хабта 100-ден астам іс-шара өткізу жоспарланған. Олар цифрлық технологияларды насихаттауға, стартаптарды қолдауға және кәсіби қауымдастықты дамытуға бағытталатын болады. Сонымен қатар, жасанды интеллект (Machine Learning және AI негіздері) және ойын әзірлеу (Game Dev) бойынша жаңа курстар іске қосылады. Бұл жастардың заманауи дағдыларды меңгеріп, IT саласында бәсекеге қабілеттілігін арттыруына мүмкіндік береді.
«Жетісу-Ақпарат»
Фото: vzlet.org
