Жігерлі сөз бойға қуат сыйлап, рухты оятып, намысты жаниды. Қайраты қайралған жан өз мақсаты жолында тау қопарары анық. Адамның жан дүниесіне мотивация арқылы сілкініс жасап әсер ету, қажеттілігін сезіне отырып тап басу – нағыз шеберлік. Әрине, жөн сілтеп, бағыт көрсету үшін де мол білім, зор тәжірибе қажет. Биыл өзі қатысқан жарыстың барлығында топжарған «Жетісу» волейбол клубының бапкері Марко Грчиштің әр жетістігі таңғалдырмай қоймайды. Оның ізденісі, талғампаздығы, турасын айтып, ойыншыларды қанаттандыруы ерекше.
«Бәріміз біріміз үшін, біріміз бәріміз үшін жұмыс істейік. Біз бір кемедеміз. Әр жанның өз міндеті бар. Бір адам еркелікке басып, жұмысын дұрыс істемесе, ол кеменің жүрісіне әсер етеді. Сол адамның қателігі үшін тұңғиыққа батып кетуіміз де мүмкін», – деді маусым басында. Команданы ұйыстырып, көңілді атмосфераның қалыптасуына да әсер етті. Одан кейінгі команданың әр ойыны жеңіске деген жігерден тұрды және өз мақсаттарын сәтті жүзеге асырды. Петропавлда болған Қазақстан кубогында, Өскеменде болған Қазақстан Суперкубогы мен ел чемпионатының шешуші кезеңінде және Филиппиннің Пасиг қаласында өткен І Азия чемпиондар лигасында «Жетісу» волейбол клубы жеңіске жетті. Әр жеңіске себепші болған жанның бірі – Марко Гршич. Ол – мотиватор, тактик, шешімгер.
Марко ізденісін бір сәт тоқтатқан емес. Үнемі ой үстінде. Әр ойынға дайындығы ерекше. Ойыншыларды жеке зерттеп, сол бойынша жұмыс жүргізеді. Ноутбугіне кешкісін отырып, таңға жуық бір-ақ тұратын сәттері болады. Түнгі екі-үште жекеңе «артық тәтті бар ма?» деп жаза салуы да мүмкін. Тәттіні шетінен жеп жұмыс жүргізуді әдетке айналдырған. Маңызды ойын болса ұзағынан дайындалады. Жетік біліп алған біз Марконың жақсы жұмыс істеуі үшін тәттілерді толтырып қоямыз. Өзінікі таусылып қалса, жазады, ал жұмыс барысын аяқтауға өзінің алғаны жетсе сұрамайды. Ойыншы бір әдісті ақылына сіңіргенше, оны сәтті шығарғанынша үйретуден тынбайды. Кейде алаң ортасына өзі де шығып көрсетеді.
Марконың үнемі айтатыны – бір-бірімізді құрметтейік, өзімізді сыйлайық. Кез келген жаттығудағы жігерлі сөзінен кейін, болмаса тактикалық түсіндіру аяқталғанда дәл осылай қорытындылайды. Марконың өзі де әр адамға құрметпен қарап, оның кеңесіне құлақ түріп, айтқанымен санасады. Кез келген тақырыпты қамтып, білгенімен бөлісуге даяр тұрады. Сөз басында мотивация беру үшін сол саланың білікті маманы, ақыл-өрісі кең, білімі ұшан-теңіз болу керектігін жаздық. Ал ондай жан үнемі ізденіс үстінде, өзін дамыту жолында жүреді. Самурайдың тәртібі сынды кітаптарды екі қайтара оқығандығын айтып, «Лоуренс Аравийский», «Дерсу Узала» сынды фильмдерді көруді ұсынды. «Жақсы кітап пен фильм адамның қалыптасуына әсер етеді», – дейді кейіпкеріміз.
«Қазақстанның табиғаты әлі жасандылыққа бой алдырмаған, бәрі табиғи. Сонысымен құнды. Бағалай білсе екен»,– деп еді бір сөзінде Марко. Күнделікті жаттығудан бір сәт демалу үшін Талдықорғанның іргесіндегі Текелі, Қарабұлақ, Көксу сынды елді мекендердегі табиғатты тамашалауға шығады. Күш алады, ой сергітеді. Одан кейінгі әсерін жасырмай әңгімелеп, тамсанған жерлерін айтады.
«Әр елдің салты басқа, қонақ күтіп алуы өзгеше. Кей тұс біз ойлағандай болмауы мүмкін, бірақ әр нәрсеге құрметпен қарайық», – деді Филиппинге аяқ тигенде ойыншыларға. Ал оған дейін әуежайда бүкіл команданы өзі бастап жүріп, әр есіктен бірінші өтіп, кейінгілерге жөн сілтеп, билеттерін пысықтап, құжаттарын түгендеп тұрды. Үш-төрт тілді жетік білетіндігі сондай, еркін сөйлесіп, газет-журналды оңай оқиды. Азия чемпиондар лигасындағы әр ойын сайын волейболшыларды жігерлендіріп «Үздіксіз жаттыққан еңбектің көрінер тұсы осы. Жеңіске жетіп жатсақ, әр күнгі жұмысымыздың жемісі. Шамамыз жетіп тұрғанда жүлдемізді уыстан шығарып алмайық» деп қанаттандырып отырды. Осыған дейін ірі жарысты көрмеген ойыншыларды да сөзімен демеп жібергенде басын төмен салып келген волейболшы өзін тіктеп, сенімді жүріске көшеді. Марконы сыртынан «мықты мотиватор» дейміз. Қиын сәтте жаныңнан табылып, қуанышты кезеңде мерейіңді екі есе өсіріп тастайды. Әр айтқанын мысалмен өрнектеп, оқыған, көргенімен байланыстырғанда өн бойың шымырлап, көзіңе от пайда болатындай.
Серік ҚАНТАЙ
