Соңғы кезде алаяқтар телефон арқылы алдаудың жаңа түрін ойлап тапты. Телефон қоңыраулары – күтпеген жаңалықты естіп, абдырап қалған адамнан құпия ақпаратты сұрап алудың немесе ақшаны басқа шотқа аудартуға мәжбүрлеудің тиімді түрі.
«БЖЗҚ» АҚ облыстық филиалы директорының орынбасары Әнуәр Елеусізовтің айтуынша, телефон арқылы жасалатын алаяқтықта қоңырау шалушы өзін зейнетақы қорының қызметкері ретінде таныстырады. Бір компанияның бас бухгалтеріне хабарласып, сол ұйым қызметкерінің зейнетақы шотының бұғатталғаны туралы хабарлайды. Компания БСН-ы бар транзиттік шоттарға тыйым салынғандығын айтады. Бұғаттан шығару үшін бухгалтер алаяқтардың шотына берешек соманың жартысын салу керектігін ескертеді. Әйтпесе, зейнетақы жарналарын уақытылы есептемегені үшін компанияға айыппұл салынады деп қорқытады. Осылайша құрбандарын өздерінің шоттарына көлемді аударымдар жасауға көндіреді. Алаяқтар жан-жақты дайындалып, үстемелете сөйлегендіктен адамның ойлануға мұршасы болмайды. Олар маманның «жанды» жерін дөп басады. Санаулы минутта қаржыгер көлемді қаржыны қалай басқа шотқа аударып жібергенін байқамай қалады. Соңынан барып ұрынғанын біліп, сан соғып қалып жатады. Зиянкестер әлемнің кез келген елінде болуы мүмкін. Олар көбінесе телефон нөмірлерді интернет желісінен алады. Жәбірленушінің аты мен табысын әлеуметтік желілерден біледі. Мұндай алаяқтықтан сақтану үшін төмендегілерді білгеніңіз маңызды.
БЖЗҚ функцияларына салымшылар мен алушыларға жинақтаушы зейнетақы жүйесі мәселелері бойынша ақыл-кеңес беру жатады. Сондай-ақ, міндетті зейнетақы жарнасы, міндетті кәсіптік зейнетақы жарнасы, ерікті зейнетақы жарналарын тарту, зейнетақы жинақтарының дербестендірілген есебі және зейнетақы төлемдерін жүзеге асыру кіреді. Зейнетақы жарналарын төлеудің толықтығы мен уақытылы жүргізілуін БЖЗҚ емес, салық органдары бақылайды. Зейнетақы жарналарын ұзақ уақыт бойы төлемеген жағдайда БЖЗҚ қызметкерлері салымшылардың төлем жасамауының себебін анықтаумен айналысады. БЖЗҚ қызметкерлері салымшыға қажетті ақыл-кеңес беру мақсатында ғана қоңырау шалады. БЖЗҚ қызметкерлері қаражатты белгілі бір шотқа аударуды талап ете алмайды.
Гүлжан Мұқашқызы
