Талдықорған қаласындағы NIS түлектері еліміздегі бірқатар іргелі оқу орнына, шетелдегі беделді университеттерге түсті. Олардың 75 пайызы еліміздегі іргелі білім ордаларына қабылданған.
Биылғы мектеп жеңістерінің қатарында Жапониядағы Токио халықаралық, Будапешт технология және экономика, Венгриядағы Дебрецен, Италиядағы LUIS, АҚШ-тағы Рочестер технологиялық институты, Дрексель, Калифорния өнер институты, Айова штаты университеті, Hult халықаралық бизнес мектебі, Хаверфорд колледжіне түлектеріміздің қабылдануын атауға болады. Бұл орайда Виктор Кахно Германиядағы Вюрцбург қолданбалы ғылымдар техникалық университетіне түскенін, Алинура Амитова ЮНИМИ университетінен Италияға шақырту алғанын айта кету керек.
Талдықорған қаласынадғы NIS түлектерінің басым көпшілігі еліміздегі университеттерді таңдаған. Оның бірі – Әлішер Бекмұстафаев. Ол Назарбаев университетіне грант ұтып алды. Кейіпкеріміздің арманы – нейрохирург болу. Сонымен қатар, биыл Талдықорған қаласындағы Назарбаев зияткерлік мектебін 72 түлек бітіргенін еске салсақ, түлектердің 18-і шетелдік жоғары оқу орындарына жолдама алған. Ал 24-і Назарбаев университетінің білім грантының иегері атанған.
