Мәжілістің экс-төрағасы Нұрлан Нигматулиннің үлкен ұлы Нұржан Нұрлановтың үстінен қылмыстық іс қозғалды.
Бұған дейін отандық кәсіпкер Қанат Әміркин Нұрлан Нигматулиннің үлкен ұлы Нұржан Нұрланов өзінен «Алатаудорстрой» компаниясын тартып алып, одан үлкен сомада ақша талап еткенін айтқан еді.
Ішкі істер министрлігі осыған қатысты пікір білдірді.
“Аталған факт бойынша Алматы қалалық полиция департаментінің тергеу басқармасы Қылмыстық кодекстің 389-бабымен (озбырлық) алдын ала тергеу жүргізіп жатыр. Қазір болған жағдайды толық, жан-жақты және объективті зерттеу үшін тергеу әрекеттері жүріп жатыр”, – деп мәлімдеді Ішкі істер министрлігі.
Алайда кәсіпкер қылмыстық істің “Озбырлық” бабы бойынша қаралатынына күмәнмен қарайды.
“Тергеу жүріп жатыр. Компанияның қайта рәсімделуі бойынша іс қылмыстық кодексінің «Озбырлық бабы бойынша тіркелген. Бірақ менің болжауымша, бұл іс рейдерлік әрекетке қайта біліктендіріліп, «Алатаудорстрой» компаниясы, сондай-ақ шығыс айналма автомобиль жолының бойындағы жер учаскесін заңсыз иеліктен шығару бойынша “Алаяқтық” бабымен қаралады”, – деді Әміркин.
Дереккөз: stan.kz
Фото: “Бәйтерек” ұлттық басқару холдингі
