Қоғамның қозғаушы күші саналған жастардың мойнына артылған сенім жүгі қашанда салмақты. Білім мен білік бәсекеге түскен шақта қазақ жастарының алдында қандай келелі іс тұр, нені жасау, нені жоспарлау керек? Күнделікті тірлікте көрініс тауып жатқан жайдарман жайттар мен келеңсіз дүниелерді елеп-екшеп, жақсысын өрістетіп, салдары ауыр тиер дүниеге қалай қарсы тұруға болады?
Міне, осындай мәселелер еркін форматта өткен кеңес отырысында айшықталды.
Жетісу облысы әкімдігі жанындағы жастар істері жөніндегі кеңестің І отырысы Тіл сарайында өтті.
Жастар саясатының жүзеге асырылу барысын саралау, ондағы негізгі мәселелерді шешу тетіктерін қарастыру мақсатында облыс әкімдігі жанындағы жастар істері жөніндегі кеңестің алғашқы отырысы өрнек тауып, оған аймақ басшысының орынбасары Диас Есдәулетов арнайы қатысты.
Шараның тізгінін алған қоғамдық даму басқармасының басшысы Бауыржан Абибеков алдымен кеңес отырысының мақсаты мен міндетін айшықтады. Өз кезегінде Жетісудың жалынды жастарын жеке-жеке таныстырып, жиынның өзегі ретінде үш мәселені қарастыратындықтарын атап өтті.
Қоғам белсенділері, облыстық мәслихат депутаттары, білім, ғылым, медиа, мәдениет, өнер, саясат бағытындағы жас көшбасшылардан сайланған кеңес мүшелері мен БАҚ өкілдері қатысқан жиында «Ауыл жастарын әлеуеттендіру мәселесі» тақырыбында журналист, Алакөл аудандық мәслихатының депутаты Алмат Есенбеков, «Жастар арасында синтетикалық есірткінің таралуына қарсы іс-қимыл мәселелері» тақырыбында журналист, PR менеджер, SММ маманы Дана Ахмедова, ««NEET» санатындағы жастармен жұмыс, өңірлік деңгейде әдіснамалық қамтамасыз ету және жұмыс алгоритмдерін қалыптастыру мәселелері» тақырыбы бойынша Талдықорған жоғары политехникалық колледжінің директоры, PhD докторы Шыңғыс Нұрғожаев баяндама жасады.
Өмірлік өзекті тақырыпқа айнала бастаған мәселелер талқыланған, жалынды жастар еркін ой сабақтаған жиында облыс әкімінің орынбасары Диас Рахметұлы сөз алып, кеңесте айтылған ұсыныстар бойынша жұмыс жүргізуді, ең алдымен, Жетісу жастарының тұжырымдамасын әзірлеу керектігін атап өтті.
– Жиында көтерілген мәселелер мен айтылған ұсыныстар өте маңызды әрі өзекті. Мен бәрін қолдаймын. Дегенмен, жиыннан жиынға тақырып ретінде көшетін, әңгімеге арқау болатын дүниенің ешқандай қажеттілігі жоқ. Іс пен нәтиже керек. Мемлекет басшысы әрқашанда нақты іспен жұмыс жасау керектігін айтады. Біз де осы үдеден табылуымыз керек, – деп атап өтті ол.
АРДА БИ
