Алакөл ауданына жұмыс сапарымен барған облыс әкімі Бейбіт ИСАБАЕВ өңірдің тыныс-тіршілігімен танысып, тұрғындарды жеке мәселелері бойынша қабылдады. Артынша халықпен кездесіп, елдің әлеуметтік жағдайын жақсарту бағытында атқарылып жатқан шаруаларды толықтай баяндады. Сонымен қатар, аудан жұртшылығын толғандырған сауалдарға жауап берді.
З. Қойшыбаева атындағы аудандық Мәдениет үйінде халықпен кездесуде облыс әкімі Бейбіт Исабаев алдымен Жетісу жеріндегі жетістіктер мен көрсеткіштерге тоқталып, айдынды өңірдің биылғы алғашқы жарты жылдықтағы әлеуметтік-экономикалық даму қорытындысын таныстырып өтті. Әсіресе, Мемлекет басшысы Қасым-Жомарт Тоқаевтың бастамасымен қолға алынып жатқан реформалардың түпкі мақсаты – халықтың тұрмыс сапасын жақсарту, азаматтардың жайлы өмір сүруіне жағдай жасау екендігіне тоқталып, биылғы қаңтар-маусым айларында облыс экономикасының барлық салалары өсімге қол жеткізіп, негізгі нысаналы индикаторлар толық орындалғанын атап өтті.
Баяндамада айтылғандай, өнеркәсіптегі өсім 10,3 пайызға жетіп, 152,4 миллиард теңгені құраса, ауыл шаруашылығында 1,5 пайызға өсіп, 104,9 миллиард теңгеге жеткен. Сондай-ақ, тұрғын үйді пайдалануға беру 30,3 пайызға, 103,9 мың шаршы метрге, құрылыс жұмыстарының көлемі 1,9 есеге, сауда көлемі 1,8 есеге ұлғайған. Облысқа 1,3 пайыз өсіммен 95,3 миллиард теңге инвестиция құйылып, жыл соңына дейін облыстың әлеуметтікэкономикалық даму қарқыны сақталып, халықтың әл-ауқатын арттыру жұмыстары жалғаспақ.
– Алакөл ауданы негізінен аграрлы өңір, жылына 70 миллиард теңгеге дейін ауыл шаруашылық өнімдерін өндіреді. Биыл 85,8 мың гектарға жеткен жалпы егіс алқабының ішінде дәнді дақылдар алқабы 4,7 мың гектарға ұлғайып, 46,6 мың гектарды құрады. Облыс бойынша 8576 гектарға қант қызылшасы себілді. Оның ішінде Алакөл ауданының үлесінде 500 гектар, – деген Бейбіт Өксікбайұлы қант қызылшасын өсірген шаруашылықтарға көрсетілер қолдауды салмақтап өтті. Бұл ретте шаруашылықтарға қант қызылшасының әрбір тоннасына 40 мың теңге төленеді, яғни, өнімді кепілді өткізуге жағдай жасалған. Сонымен қатар, биыл күзде техникалық жағынан қайта жаңартылған Ақсу қант зауытын іске қосу көзделуде. Ендігі кезекте осы мүмкіндікті пайдалана отырып, ауданда қант қызылшасының егістігін ұлғайту қажет.
– Егіс алқаптарын суармалы сумен қамтамасыз ету және оны мақсатты пайдалану үшін тиісті шаралар қабылдануда. Атап айтсақ, Тентек өзенінің су торабындағы механизмдеріне ағымдағы жөндеу жұмыстары жүргізіліп, көтергіш, тежегіш жүйелері толық жөндеуден өтті, 4 сегменттік қақпаның тығыздағыш тақталары ауыстырылды. Бұған қоса, аудандағы 800 шақырым суару жүйелерін қайта жаңғырту үшін жобалық-сметалық құжаттар әзірленуде, нәтижесінде 31,2 мың гектар жерді сумен қамту жақсарады, – деген облыс әкімі өткен кездесуде көтерілген Жаманты өзеніне су қоймасын салу мәселесі бойынша облыстық бюджеттен 21,8 миллион теңге қаражат бөлініп, техникалық-экономикалық негіздемесін даярлау басталғанын жеткізді. Келесі жылы жобалық-сметалық құжаттары дайындалып, құрылыс жұмыстарына қажетті қаражат бөлу жөнінде Үкіметке ұсыныс берілмек. Қолдау тапса 4,2 мың гектар суармалы жер айналымға қосылады.
Айдар ҚАЛИЕВ
