Қазақстандық теннисші Арсланбек Айтқұлов халықаралық деңгейде төрт жылға спорттан шеттетілді. Бұл туралы 7-SU.KZ ақпараттық порталы хабарлайды.
21 жастағы спортшының сынамасынан тыйым салынған анаболикалық заттар – лиганрол және метилгексанамин анықталған. Бұл препараттар Дүниежүзілік допингке қарсы кодекс бойынша қатаң тыйым салынған заттардың қатарына жатады.
Айтқұлов 2024 жылдың басында Дохада (Катар) өткен турнир кезінде тексерілген. Сол кезде алынған сынамадан допинг табылып, ITIA 14 наурызда спортшыға хабарлама жіберіп, 16 наурыздан бастап уақытша шеттеткен.
2025 жылдың 30 маусымында өткен онлайн тыңдауда тәуелсіз трибунал Айтқұловқа төрт жылға дисквалификация беру туралы шешім шығарды. Жаза мерзімі 2028 жылдың наурызына дейін жалғасады. Осы уақыт ішінде спортшыға ресми турнирлерге қатысуға, жаттығу жасауға және теннис жарыстарына баруға тыйым салынды.
ITIA мәлімдеуінше, ойыншыға тыйым салынған заттардың шығу көзін дәлелдеуге уақыт берілген, алайда ол бұл талапты орындай алмаған. Сондықтан алғашқы ереже бұзушылық ретінде толық төрт жылдық жаза тағайындалды.
Айта кетейік, Қарағанды тумасы Арсланбек Айтқұлов 2023 жылдың қарашасында ATP рейтингінде ерлер арасындағы жекелей сында 1250-орынға көтерілген. Оның кәсіби мансабындағы жалпы жүлде қоры 10,5 мың АҚШ долларынан асады.
