Әне-міне дегенше Ислам әлемі үшін қасиетті Рамазан айы басталды. Биыл қасиетті Рамазан айы 1 наурыздан басталып, 29 наурызда аяқталмақ. 30 наурыз Ораза айттың алғашқы күні. Ал Қадір түні наурыз айының 26-нан 27-не қараған түн. Биыл пітір садақа ел бойынша 655 теңге болып бекітілді.
Жылдағы дәстүр бойынша облыстағы дін өкілдері Рамазан айына дайындық барысы мен қасиетті айдағы жоспарларын журналистермен бөлісті. Облыстың бас имамы Керімбек Дәуітов пен облыстық дін істері басқармасының басшысы Сағыныш Жаңабай ақжолтай жаңалықтарын да ортаға салды.
Бас имамның айтуынша, өңіріміздің 41 мешітінде тұрақты ауызашар беріледі екен. Сондай-ақ, Түркиядан 3 қари келіпті. Олар мешіттерде намаз оқып, хақ жолындағы мұсылмандардың міндеттерін түсіндіреді. Сонымен қатар, жергілікті дін өкілдерімен тәжірибе алмасуға орайлы бастама болып отыр.
– Рамазан – мұсылмандар үшін терең діни мағынасы бар исламдағы ораза және дұға айы. Ислам күнтізбесінде Рамазан – бүкіл әлемдегі мұсылмандар таң атқаннан күн батқанға дейін ораза ұстайтын тоғызыншы ай. Сондықтан әр қалада өз жұмыс кестесі бар. Ораза кезінде адамның қарапайым қажеттілігінен және одан да көп артықшылықтан толық бас тарту мұсылмандарға өздерінің сенімдерінің күшін растауға, өзін-өзі бақылауды үйренуге және рухани тазаруға ықпал етеді, – деді облыстың бас имамы Керімбек Дәуітов.
Облыстық дін істері басқармасының басшысы Сағыныш Жаңабай қасиетті айдағы қоғамдық қауіпсіздікті қамтамасыз ету төңірегінде сөз қозғады. Жыл сайын Рамазан айында балалардың ораза ұстауы қоғам арасында қызу талқыға түсетінін де жасырмады. Бұл ретте ақпараттық түсіндірме жұмыстарын да күшейту керегін айтты.
– Ауызашар беру рәсімдерінде ысырапшылдыққа жол берілмей, мейлінше қарапайым деңгейде өткізу және жалпы ауызашарды даңғаза тойға айналдырмау керек. Мешіт имамдары тарауиқ, жұма, бес уақыт намаздары барысында айтылатын уағыз-насихаттарда елді ынтымақ-бірлікке шақырып, қоғамның дертіне айналған нашақорлық, жемқорлық, ысырапшылдық, лудомания және т.б. өзекті мәселелер туралы кеңінен таразыласа. Рамазан – тазару айы. Қоғам осындай мәселелерден тазарса, – деп тілек те білдірді.
Дастанбек САДЫҚ
Фото: depositphotos.com
