Сарқан қаласында көгалдандыру мен абаттандыру жұмыстарының сапасын арттыру мақсатында заманауи тамшылатып суару жүйесі кезең-кезеңімен енгізілуде. Аталған жүйе биыл «Қойтас» саябағына орнатылып, нәтижесінде мұнда отырғызылған шырша ағаштары күнделікті белгіленген мөлшерде автоматты түрде суарылып отыр.
Тамшылатып суару әдісі өсімдіктерге қажетті суды дәл әрі үнемді түрде жеткізуді қамтамасыз етіп, артық ылғал мен ысырапты болдырмайды. Бұл жүйе саябақтағы көгалдар мен ағаштардың күтімін айтарлықтай жеңілдетіп, оларды ұзақ мерзім бойы жасыл әрі көрікті күйде сақтауға мүмкіндік береді. Сондықтан да «Жастар» саябағында дәл осы әдіспен гүлзарлар мен шырша ағаштары суарылуда.
Жасыл желекті аймақтың көркін ашатын гүлдер мен ағаштар енді арнайы жүйе арқылы уақытылы су алып, өзегіне нәр барған көкөскіндер қанат жайып тұрғындар мен қонақтарға көтеріңкі көңіл-күй сыйлап келеді. Сондай-ақ, Алдияр батыр ескерткіші маңындағы шырша ағаштарына да тамшылатып суару жүйесі қосылып, күтім деңгейі сапалы бола түсті.
Қаланы көгалдандыру және экологиялық жағдайды жақсарту бағытында атқарылып жатқан бұл жұмыстар – Сарқанның жасыл желекті, жайлы да әсем қалаға айналу жолындағы нақты қадамның бірі.
Жақсылық ЖОМАРТҰЛЫ
