Қазақ әдебиетіндегі үш бәйтерек – Сәкен Сейфулин, Ілияс Жансүгіров, Бейімбет Майлиннің туғанына биыл 130 жыл. Айтулы датаға орай «Самал» шағынауданы ардагерлер ұйымы мен Талдықорған қаласындағы №12 мектеп-гимназиясының ұжымы бірлесіп әдеби-танымдық шара өткізді.
«Самал» шағынауданы ардагерлер ұйымының жетекшісі Қ. Тұрлұғұлова, №12 мектеп-гимназиясы директорының ұйымдастыру жөніндегі орынбасары Э. Асланқызы, 9-сынып жетекшісі Қ. Бәкешқызының ұйытқы болуымен өткізілген шарада бір жылда туып, бір жылда өмірден озған үш бәйтеректің өмірі мен шығармашылығы сөз етілді. Ал оқушылар оқыған өлең мен шырқаған ән, бастауыш сынып балалары қойған «Тәуелсіз елдің қызымын» атты қойылым шараның шырайын ашса, баянист Н. Қырықбаевтың сүйемелдеуімен ардагерлер ұйымының белсендісі Т. Қоржынбаев орындаған «Шиліөзен» әні көптің көңілін көтерді. Әдеби-танымдық шараны бастан-аяқ №12 мектеп-гимназиясының музыка пәнінің мұғалімі Ш. Тұрсынбеков музыкамен әрлеп, көркемдеді.
Шара соңында қаламыздың құрметті азаматы, тарихшы- профессор Х. Есдәулетова сөз алып, жылы лебізін білдірді. Сондай-ақ, өзінің «Алаш партиясы» атты кітабын мектеп кітапханасына тарту етті.
Аталмыш шараға қалалық ардагерлер кеңесі төрағасының орынбасары М. Қожабеков, жауапты хатшы Б. Боранбаева, мектеп ұстаздары мен оқушылары қатысты.
С. Базарқұлова
Талдықорған қаласы
