Алматы-Өскемен тас жолы. 252 шақырым. Полиция қызметкерлері жүргізушілер мен жолаушыларға ас-су ұсынып жүр. Тәртіп сақшылары мұнымен қоймай сауалнама өткізуде. Қойылған сұрақтарға жөнді жауап бергендерге автокресло тарту етуде. Бұл «Жолдағы қабылдау» акциясының барысы.
«Жолдағы қабылдау» акциясына облыстық жолаушылар көлігі мен автомобиль жолдары басқармасының автомобиль жолдары бөлімінің бастығы Нұрлан Далдыбаев, «ҚазАвтоЖол» АҚ өңірлік филиалы директорының орынбасары Жасұлан Қалтаев және ҚР Сыбайлас жемқорлыққа қарсы іс-қимыл агенттігі департаментінің Превенция басқармасының аса маңызды істер жөніндегі офицері Асем Изгуттиева қатысты.
Бес айдың қорытындысы бойынша 231 жол-көлік оқиғасы тіркелген, 39 адам көз жұмды, 339 адам жарақат алды. «Жолдағы қабылдау» акциясы осындай олқылықты болдырмау, тас жолдағы трагедияны азайтуға бағытталған. Жетісу облысы полиция департаменті бастығының бірінші орынбасары Жасұлан Байкенов осылай деп ой түйеді.
– Шара халыққа құқықтық көмек көрсету, азаматтардың құқықтық сауаттылығын арттыру, жол-көлік оқиғаларының алдын алу, сыбайлас жемқорлыққа қарсы тұру, қоғаммен байланыс алаңын кеңейту, көші-қон заңнамасын сақтау және азаматтардың полицияға деген сенімін арттыруды көздейді. 14-15 маусым аралығында өткен шара барысында алыс жолдан шаршаған жүргізушілер мен жолаушыларды сергітуді көздедік, – дейді Жасұлан Байкенов.
Шара барысында құқық қорғаушылар жүргізушілерді мемлекеттің құқықтық негіздерімен таныстырды, жол қозғалысы қауіпсіздігіне қатысты заңнамадағы өзгерістер туралы ақпараты бар кітапшалар таратылды. Сондай-ақ, жол бойындағы сервисті іздеу және бағыттарды жоспарлау үшін «Kazway» мобильді қосымшасы туралы түсіндірме жүргізілді.
Дастанбек САДЫҚ
