Ескелді ауданы – ауыл шаруашылығын дамытып, оны өркендетуге қолайлы өңірлердің бірі. Бүгінде мемлекет тарапынан берілетін қолдау, инвесторлық жұмыс арқылы өз жобаңды жүзеге асыруға тамаша мүмкіндіктер бар. Би бабаның атындағы ауданда орналасқан үш нысанда – тұшпарасымен танымал «Ли-Шан-Шин», бөдене етімен жұмыртқасын өндіруден еліміздегі теңдесіз «Сәлем Құс» қожалығы, сүт тауарымен айналысатын «Сүт Мастер-М» фермасында болдық. Жұмыстарын көрдік, өнім сапасына мән бердік.
Ауданда ғана емес, елімізде теңдесіз қожалықтардың бірі – «Сәлем Құс» ЖШС. Бағдат Серікқожаевтың идеясы арқылы ашылған бөдене шаруашылығы жөнінде аз айтылып, кем жазылған жоқ. Былтыр бөдененің 6 миллион жұмыртқасын, 5 тонна етін өндірді. Биыл күніне 20 мың дана жұмыртқамен 20 келі бөдене еті сатылымға шығып жатыр. Жұмыртқалары ел нарығына шықса, бөдене еті экспортталып БАӘ тасымалданады. Тасымалдау тұрғысында болатын қиыншылықтар аз емес. Әйтседе көрген қожалық қызметкерлері орайын тауып, жұмыс күшін реттеп отырады. Қожалыққа қатысты мәселе жөнінде Бағат Серікқожаев «бөденеге арналған тамақ – 20 қоспадан тұрады. Оны еліміздің әр өңірінен жинаймыз. Негізгі қоспа – соя, бидай, жүгері. Бізге қымбатқа шығатыны да, қалтаға салмақ салатыны да соя болып тұр. Осы тұрғыда соя өсіретін суармалы жер болса дейміз» – деді. Біз барғанда аумағын кеңейтіп, тағы да қосымша бөденеге арналған жылы орын салып жатты.
«Вкусняшки» тұшпарасы облысымызда кеңінен танымал. Сауда да өтімді. Кәсіпорыын Қарабұлақ ауылындағы Оразбеков көшесінде орналасқан. Сиыр, қой, жылқы, шошқа етінен жасалған тұшпараға сұраныс ерекше. Етті жергілікті шаруалардан алады. Бұл жерде жиырмаға жуық қызметкер бір ауысммен жұмыс істейді. Иесі Сергей Ли Шан Шин Көксу ауданында дүниеге келген, іскерлік жолды ерте жастан серік еткен. Жұмысшылардың барлық жағдайы жасалған.
– Осы жерде табан аудармастан көп жылдан бері жұмыс істеп жатқандар бар. Өзім де осы ортаға қосылғаныма қуаныштымын. Ал өніміміз таза, табиғи. Жуа қосамыз, қалғаны таза ет. Сондықтан да болар тұтынушылар риза. Үйде қалай жасасақ, осы жердеде дәл солай дайындаймыз. Ауыл ішінде осындай орын ашылып, көптеген адамды жұмыспен қамтып отыр. Жалақысы жақсы, тұрақты, – дейді кәсіпорын қызметкері Алмагүл Увансынова.
Аудандағы Көкжазық ауылының іргесінде орналасқан 200 басқа арналған сүт тауарлы «Сүт Мастар-М» фремасы 2021 жылдан жұмыс істейді. Инвесторлық жобалардың бірі. Ферма басшысы Фарид Жаһангир ферма қуаттылығын 200 бас сауын сиырдан 600 басқа дейін кеңейтуді жоспарлап отыр. Бастапқыда Германиядан 33 бас, былтыр 34 бас гольштейн тұқымды сиырлар алып келген. Өткен жылы 160 тонна сүт өндірілді. Биыл күніне 60 сиыр сауылады. Тәуліктік сүт сауымы – 800 литр. Ал сауылған сүт Көксудағы «Арқабаев ЛТД» ЖШС жеткізіледі.
– Малмен айналысып, бағып-қарап жүргеніме 40 жыл болды. Гольштейн – сүтті, құнарлы, өнімді мал. Бұзаулары тез өседі. Салыстырмалы түрде алып қарасаңыз 5-6 айлық бұзауы жергілікті тұқымның бір жасарындай көрініп тұрады. Салмағы да, бойы да. Күтімнің арқасында сиырлар 30 литр сүт береді. Тағы да екі база салу жоспарланып жатыр, мал басы көбейеді. Бұл ауыл азаматтары үшін де жақсы, тұақты жұмысқа орналасуға мүмкіндік,– дейді Байкал Көптілеуов.
Біз барған, аралап көрген әр нысанның негізгі мақсаты – сапаға мән беру. Нарықтағы ел өнімін көбейту. Таибиғи, таза жергілікті өнім санын арттыру. Бұл тұрғыда мемлекет те қолдау көрсетіп жатыр, инвесторлар да іске кіріскен. Аудандағы әр нысан – ел игілігіне қызмет етсін.
Қали АСҚАР
Суреттерді түсірген Жеңіс Ысқабай
