Шерзатқа қатысты қылмыстық іс бойынша сот отырысында айыпталушы Нұрбол Тоқтаубаев жанжалдың қалай басталғанын егжей-тегжейлі айтып берді. Оның айтуынша, ол оқиға орнына танысы Дархан Әскентайдың шақыруымен барған.
— Дархан «біреулер ұрып кетті, алып кет» деп хабарласты. Сыра ішіп отырған соң, көлік жүргізу үшін танысым Думанды шақырдым. Барсақ, Дархан дүкен сыртында тұр екен. Бет-аузы қан. Оны кім ұрғанын сұрағанымда, «дүкен сатушысының баласы» деді, — дейді Тоқтаубаев.
Оның айтуынша, мән-жайды білу үшін дүкен ішіне кіріп, Қаржаубай Нұрымовпен сөйлескен. Қаржаубай төбелесті біресе өзі, біресе баласы бастағанын айтып, 1000 теңге қарыз бар екенін жеткізген. Тоқтаубаев 1500 теңге төлеп кеткен.
Алайда арада біраз уақыт өткен соң, ол дүкенге қайта оралғанын айтады.
— Кейін Дарханның өзі ақша төлегенін білдім. Өз ақшамды қайтару үшін қайтып келдім. Сол кезде Қаржаубай бізге қарсы шығып, пышақпен қорқытты. «Өлтірем» деді. Осы кезде Нұрқанат біреулерге телефон шалып, көмекке шақырып жатты. Мен де інімді шақырдым. Арада біраздан соң төбелес басталды, — деді ол.
Айыпталушының сөзіне сүйенсек, Нұрқанат Ғайыпбаев алғашқыда мылтықты аспанға атқан, кейін адамдарға бағыттап оқ жаудырған.
— Мен Нұрқанатты бір-екі рет тептім. Бірақ ешкімді пышақтаған жоқпын. «Хуторскиймін, 95-пін» деген де емеспін, — деді Тоқтаубаев.
Қазір сот процесі жалғасып жатыр. Іс аясында бірнеше куәгер мен тараптар жауап беруде.
«Жетісу-Ақпарат»
